Read Thado Chin Potdohbu 8 Bible Online

Potdohbu 8 - Thado Chin bible

Potdohbu 8

¹Chuin Pakaiyin Mosi jah-a, Pharaoh henga gachen lang, ajah-a hitin gaseijin, Pakaiyin hitin aseije, Eijen theina diuvin kamite soldoh tan.

²Chule nangman amaho chu nasol nomlouva ahile, ven, keiman nagamsung pumpi uphoh-a kajep ding ahi.

³Chule vadung chun uphoh atama tam ahinsepdoh ding, hicheho chu na-in sung, na-indan sung, najalkhun chung, nasohte insung, namite chung, nathuh khuh sung, chule nachang bong mehnao kong houva hunglut ding ahiuve.

⁴Chule uphoh ho chu nangma chungle namite chung, chule nasohte jouse chunga hung kaltou diu ahi, tin seijin ati.

⁵Chuin Pakaiyin Mosi henga, Aaron henga seijin, Vachadung ho chule vadung hole twikul ho chunga natenggol pumin nakhut chu jahdoh inlang uphoh hochu Egypt gam chunga hungdoh sah-in, tin, ati.

⁶Hiti chun Aaron'in Egypt twi chunga chun akhut ajahdoh-in ahile uphoh ho chu ahungdoh-un, Egypt gam chu alodim taovin ahi.

⁷Chuin mitphel doithem ho jong chun adoiju chu mangchan chutobangma chun abolun, Egypt gam chunga chun uphoh hochu ahungdoh sah-un ahi.

⁸Hichun Pharaoh'in Mosi le Aaron akouvin, ajah lhona, Keima le kamite-a kona uphoh hohi alahmang nadingin Pakai henga ngeh lhonin; chutengle Pakai henga ganlhaina boldinga mipi chu kasol ding ahi, ati.

⁹Chuin Mosi'n Pharaoh jah-a, Lunglhai selin neithu peh-in, itih phatle nangma le na-insunga kona uphoh ho suhmanga auma vadunga bou aumna dinga nangma-a ding, nasohte-a ding, chule namite dinga katao dingham? ati.

¹⁰Chuin aman, Jingle ati. Chuin aman, Pakai ka Pathen'u bang hi koimacha dang aumpoi ti nahet nadingin: nathusei dungjuijin hitahen.

¹¹Chule uphoh hochu nangma-a kon, na-insung ho-a kon, nasohte-a kon, chule namite-a kona chemanguva, vadunga bou umdingu ahitai, ati.

¹²Chuin Mosi le Aaron chu Pharaoh koma konin apotdoh lhontai. Chuin Mosi'n Pharaoh douna-a uphoh ho asosah jehchun Pakai henga ataotan ahi.

¹³Chuin Pakaiyin Mosi thu dungjuijin ahinboltan: chuin uphoh ho chu inho, kho ho, chule louho-a konchun athigam taovin ahi.

¹⁴Chuin amahon hiho chu alhuh lhuh-in asekhom mun: gamsung chu apumpin a-uitan ahi.

¹⁵Ahivangin Pharaoh'in chomkhat akicholdona amuphatnin, Pakaiyin anasei bangin alung atahsah-in; amani thusei chu angaipeh tapon ahi.

¹⁶Chuin Pakaiyin Mosi henga, Aaron jah-a, Egypt gam pumpi-a leivuichu kha ahung so nadin natenggol lamin lang gamsunga leivui chu jepmin, tin seijin, ati.

¹⁷Chuin amanin chutichun abol lhontan ahi: ajehchu Aaron'in atenggol chu akhut toh alamin, leisetna leivui chu ajepmin ahile sa le mihem chunga chun kha ahung langtan; chuin Egypt gam pumpi-a chun tolla leivui jouse chu kha ahungsoh tan ahi.

¹⁸Chule mitphel doithem hochun adoiju chu amang chaovin kha asosah gouvin, ahivangin amahon abolthei tapouvin ahi. Chutichun sa le mihem chunga chun kha alangtan ahi.

¹⁹ Chujouvin mitpheldoi themho chun Pharaoh henga, Hichehi Pathen khutjung ahi atiuvin ahi. Chuin Pakaiyin anaseisa bang chun Pharaoh lungsung chu tahsah-in aumin; aseilhon angaipeh tapon ahi.

²⁰Chuin Pakaiyin Mosi henga, Jingpi matah-in thouvin lang Pharaoh anga gadingin: ven, ama twikhuh lama ahunge; chule nangman ajah-a, Pakaiyin hitin aseije, Amahon eijen theina dingun kamite soldoh-in ati.

²¹Chutilouva, nangman kamite nasoldoh louva ahile, ven, nangma chung, nasohte chung, namite chung, chule na-insung chunga thousivaibong kahin lansah ding; Egypt mite insungho le adinnau leiset chunga chu thousivaibong dimset ding ahi.

²²Chuche nikho chule kamite chenna Goshen gamchu kakhendoh ding, chukoma chu thousivaibong himhim umlou ding; chuteng keima leiset lailung Pakai kahi nahetdoh ding ahi.

²³Chule keiman kamite le namite kah-a kikhenna kakoi ding: jingle hiche melchihna chu hung umding ahi, gatin, ati.

²⁴Chuin Pakaiyin chutichun aboltan; Pharaoh insung le asohte insunga, chule Egypt gam pumpi-a chun genthei umtah thousivaibong ahung lhungtan: thousivaibong jehchun gam chu suhboh-in aumtan ahi.

²⁵Chuin Pharaoh'in Mosi le Aaron chu akouvin, ahenglhona, Nangho cheovin lang hiche gamahin na-Pathen'u henga ganlhaina ganei taovin, ati.

²⁶Chuin Mosi'n, Chutobanga bolding chu thildih ahipoi; ajehchu keihon Egypt mite-a dinga thet umtah hochu Pakai ka-Pathen'u henga ganlhaina-a kaneidiu ahi: ven, Egypt mite dinga thet umtah hochu amitmu tah uva ganlhaina-a kaneijuva ahile, amahon songa eiselou dingu ham?

²⁷Aman eithupeh banguva gamthip nithum lama kacheuva, Pakai ka-Pathen'u henga ganlhaina kanei dingu ahi, ati.

²⁸Chuin Pharaoh'in, Pakai na Pathen'u henga gamthipma ganlhaina nanei theina dingun nasolu vinge; ahin gamlatah-a vang nachelou dingu ahi: keima dingin neitao peh-un, ati.

²⁹Chuin Mosi'n, Ven, keima nakoma kona kachedoh-a, Pharaoh le asohte, chule amite-a kona thousivaibong hohi jinga patna achemang nadiuvin Pakai koma kagatao ding ahi: ahin mipi ho chu Pakai henga ganlhaina neidinga chesah louna dingin, Pharaoh'in dohan neibolkit tahih-un, ati.

³⁰Chuin Mosi Pharaoh anga konin apotdoh-in, Pakai henga ataotan ahi.

³¹Chuin Pakaiyin Mosi thusei bangchun abolin; chule thousivaibong hochu Pharaoh'a kon le asohtea kon, chule amite-a konin aladoh-in; khatcha jong aumdena aumpon ahi.

³²Chuin Pharaoh'in hiche chunga jong hi alung atahsah-in, miho chu asoldoh dehpon ahi.