Read Thado Chin Potdohbu 9 Bible Online

Potdohbu 9 - Thado Chin bible

Potdohbu 9

¹Chujouvin Pakaiyin Mosi henga, Pharaoh koma lutnin lang ajah-a, Hebrew mite Pakai Pathen'in hitin aseije, Keima eihou theina diuvin kamite chu soldoh tan.

²Nangman amaho soldoh ding nada-a, nahen jing nahlaija ahile,

³Ven, loujaova um naganchaho chung, sakol ho, sanganho, sangongsang ho, bongchalho, kelngoiho chungah Pakai khut chuding: gancha pul khohtah langding ahi.

⁴Chule Pakaiyin Israel mite gancha honle Egypt mite gancha hon chu achomkhen ding: chule Israel chate-a poupou chu khatcha jong thilou ding ahi, tin gaseijin, ati.

⁵Chuin Pakaiyin phatbih khat atepmin, Pakaiyin jing nikhole hiche thilhi gamsunga abolding ahi, ati.

⁶Chutichun ajing nikhon Pakaiyin chuche thil chu aboltan, Egypt gamsunga gancha jouse chu athitai: ahinla Israel chate gancha ho chu khatcha jong athipon ahi.

⁷Chuin Pharaoh'in mi asolin, chule veuvin, Israel mite gancha khatcha jong athi aumpon ahi. Chuin Pharaoh lungthim chu akisutah-in; chule miho chu alhadoh dehpon ahi.

⁸Chuin Pakaiyin Mosi le Aaron henga, Nangnin thuh sunga konin vut khutdim la lhonin lang, hichu Mosi'n Pharaoh mitmu tah-in van lama thehen.

⁹Hichu Egypt gamsung jouse-a leivuinel soh ding, Egypt gamsung pumpi-a mihem chungle gancha chunga uilut le mase nasatah chaljal ding ahi, ati.

¹⁰ Chuin amanin thuh sunga vut chu ahamlhonin, Pharaoh angsunga ading lhonin; chuin Mosi'n hichu van lama athen ahile, mihemle gancha chunga chun uilut ahungsoh tan, mase khohtah achaljal tan ahi.

¹¹Chuin chuche uilut jehchun mitpheldoi themho chu Mosi masanga adingthei tapouvin ahi; ajehchu uilut chu mitphel doithemho le Egypt mite jouse chunga chu-ah ahi.

¹²Chuin Pakaiyin Pharaoh lungthim chu atahsah-in, Pakaiyin Mosi henga aseibang chun athu seilhon chu angai pehpon ahi.

¹³Chuin Pakaiyin Mosi henga, Jingpitah-in thouvin lang, Pharaoh henga gadingin, chule ahenga, Hebrew mite Pakai Pathen'in hitin aseije, Keima eihou theina diuvin kamite soldoh tan.

¹⁴Ajehchu leiset chung jouse-a hin keima tobang koimacha aumpoi ti nahet nadinga, tuchunga hi nangma lungsung chung le nasohte chung, chule namite chunga ka hise jouse kahin chuhsah ding ahi.

¹⁵Ajehchu nangma le namite chu hise-a kajep theina dinguva, tu-a hi keiman kakhut kalhandoh ding: chule nangma leisetna kona paidoh-a naum ding ahi.

¹⁶ Chule kathahat nahi nangma vetsah nading le kamin hi vannoi leiset pumpi-a phondoh-a aumna dinga, hiche jeh tah-a hi nangma katundoh nahi.

¹⁷Tugeihin nangman amaho nasoldoh louva konhin, kamite douna-in nangle nang naki choisangin ahi.

¹⁸Ven, jing nikho tuphat tah hile Egypt gam kiphudoh-a pat tuchan geija anaumkha louhel, gel nasatah chu kahin juhsah ding ahi.

¹⁹Hijeh chun tun mi solinlang, loujaova um nagancha jouse gakhop khom sah-in; ajehchu in'a kipuilut louva loujaova um mihemle gancha chung jouse-a chu gel hunglha ding, amaho chu thiding ahiuve, gatin, ati.

²⁰Chuin Pharaoh sohte lah-a Pakai thu gingho chun asohteu le aganchahou chu insunga ajamlut sah loijun ahi.

²¹Chule Pakai thu ngaisah louho chun asohteu le aganchahou chu louva adalha denun ahi.

²²Chuin Pakaiyin Mosi henga, Egypt gam jouse mihem chung le gancha chung, chule Egypt gamsung jouse-a louva hampaho jouse chunga gel ahunglhah nadingin, van lama nakhut jahdoh-in, ati.

²³Chuin Mosi'n atenggol chu van lama ajahdoh tan ahi. Chuin Pakaiyin van ginle gel ahinsoltan; mei chu leichunga avahmat jengin; hitichun Pakaiyin Egypt gam chunga chun gel alhah sahtan ahi.

²⁴ Chutichun gel, meito kihal gel alhan, akhohset danchu namkhat ahung hiuvapat Egypt gamsunga hitobang hi aumkha khapon ahi.

²⁵Chuin Egypt gam jouse-a loujaova thil um jouse, mihem le gancha jong gel chun aseplih gamin; chule gel chun loujaova hampa louhing jouse aseplih-in, gama thing jouse jong asepbong gamtan ahi.

²⁶Israel chate umna Goshen gama chun bou gel alhapon ahi.

²⁷Chuin Pharaoh'in mi asolin, Mosi le Aaron chu agakou sah-in, aheng lhona chun, Tuchung hin keima kachonse tai; Pakai chu achonpha ahin, keima le kamite vang gilou kahiuve.

²⁸Van gin nasatah le gel hi abeina dingin, Pakai henga ngeh lhonin, (ajehchu phasetna ahitai;) keiman nangho kasoldoh uva, nangho na-umsot tahlou dingu ahi, ati.

²⁹Chuin Mosi'n ahenga, Keima khopi sunga kona kapotdoh dohle Pakai henga kakhut kajahdoh ding: leiset hi Pakaiya ahi nahetdoh nadinga van gin chu thipding, geljong lhahbe louding ahitai, ati.

³⁰Ahivangin nangma le nasohte thudol vang, nanghon Pakai Pathen chu nagindeh lou dingu ahi kahei, ati.

³¹Chule tupat phungle sakol chang chu suhmangin aumtan ahi. Ajehchu sakol chang chu avui ahungdoh tan, tupat phung vang chu apahlaitah ahi.

³²Ahin suhlou chang le butun vang akedoh loulai jeh-in suhmangin aumpon ahi.

³³Chuin Mosi Pharaoh koma konin khopi chu adalhan, Pakai henga akhut ajahdoh-in ahi; chuin van ginle gel chu atangtan, lei chunga go ajutapon ahi.

³⁴Chuin Pharaoh'in go le gel chule van gin ho atan amuphatnin, chonset abolbe nalaijin, amale asohte chun alungthimu atahsah kit taovin ahi.

³⁵Chuin Pharaoh lungthim chu suhtah-in aumin, Pakaiyin Mosi henga anasei bang chun, Israel chate chu alhadoh dehpon ahi.