Read Thado Chin Job 1 Bible Online

Job 1 - Thado Chin bible

Job 1

¹Uz gamsunga chun amin Job atiu mikhat anachenge. Amapa chu chamkimle mikitah anahin, chuleh Pathen ginga setna nungsun jing mi anahi.

²Chule aman chapa sagile chanu thum ahinge.

³Aman aneiho chu kelngoi sangsagi, sangongsao sangthum chule bongchal to janga chule sanganpi sanga ahin, chuleh insung lentah ahi; hijeh chun hichepa chu solam miho jouse lah-a milenpen anahi.

⁴Chuin achapate chun a-inhouva ama ama nikhosehle golvah bollin ache jiuve. Hichea chun nehkhom donkhompi ding chun asopi numei thum jongchu akoujiuve.

⁵Golvah nikho kitol chu akichai phatnin, Job'in mi asollin achate chu asuthengjin chuleh Jingpi tahle athoujin achate khatcheh ding chun govam thilto abolpehjin ahi; ajehchu Job'in, kachate Pathen douna-in chonse khaovintin, chule alungun Pathen chu gaosap khaovinte, ati ahi. Hitichun Job'in tanglouvin abol jingin ahi.

⁶ Tun nikhat Pathen chapate chu Pakai angsunga acham chama ahung kikhop nikhou ahung lhungin, alah uva chun Satan jong ahungpange.

⁷Chule Pakaiyin Satan jah-a hoija kona hung nahim? ati. Satan'in Pakai chu adonbutnin, leiset chunga suhle tunga kavalea chule chungle noi kakoptoa kahung ahi, ati.

⁸Chuin Pakai chun Satan jah-a nangman kalhacha Job khu iti nagellem? Leiset chunga michamkim, mikitah Pathen ginga chule asetnalam nungsun jing amatobang aumdem? ati.

⁹ Chuphatnin Satan'in Pakai chu adonbutnin, Job'in Pathen chu mohseh a agin hija ong? ati.

¹⁰Nangman amale a-insungmite chule aneijousele aveljouse pal nakaikhum hilouham? Nangman akhut tenin atoh jouse phatthei naboh in, chule hiche gamsunga hin anei agou apung chehcheh-in ahi.

¹¹Ahinla tun nakhut lhang inlang aneijousehi tongkha lechun, aman namaichang tah a nagaosap tante ati.

¹²Chule Pakai chun Satan jah-a, ven, aneijouse khu nangma thaneina ahitai; amatahsa chunga vang nakhut lha hih in. Hitichun Satan chu Pakai angsunga konchun achedohtai.

¹³Chule nikhathi a-upa pennu inna chun achapate achanute chun nehkhom donkhom abolpetnu chun:

¹⁴thangkou mikhatnin Job henga thu ahung lhutnin, hitin aseije. Bongchal hon lou akaipetnu, chule sanganhon akomuva ham aneh petnun,

¹⁵Seba miho chun ahindel khumuvin abonun akaimangun chule sohdangho jouse jong chu chemjamin athatnun, kei changseh bouhi nangma hildinga hung hoidoh kahi, ati.

¹⁶Aman hiche thuchu asei nalaijin, midang khatma ahung lhungin hitin aseije, Pathen meichu van'a konin ahungleng lhan, kelngoihole soh ho chu akataovin amaho meijin ahalvamtai. Kei changseh bouhi nangma hildinga hung hoidoh kahi, ati.

¹⁷Aman hiche thuchu asei nalaijin, midang khatma ahung lhungin, Chaldea miho loithumin akisemmun sangongsao ho ahindeluvin, amahochu akaimang taove. Kei changseh bouhi nangma hildinga hung hoidoh kahi, ati.

¹⁸Aman hiche thuchu aseinalaijin, midang khatjong ahunglhung paijin nachapate le nachanutehon a-upa penu in'a an aneh uva lengpitwi adonpet tah-un,

¹⁹Chule ven, gamthipma konin khopihuijin in ningli chu ahinmutnin ahile, in chun khangdongho chu alhuh khumin, amaho athigam taove. Chule kei changseh bouhi nangma hildinga hung hoidoh kahi, ati.

²⁰Chutah in Job chu akipatdoh-in, asangkhol lenchu abottelin, asam akivotolin, chuin tolla aboh khupmin, Pathen chu ahoutai,

²¹Chule hitin aseije, kanu naobu sunga kona kasagoh keova hungdoh-a kahin, sagoh keova kakilekit ding ahi. Pakai chun eipeh ahin, Pakai chun akile lahkit ahi; Pakai min chu nunnom hen.

²²Hicheng jouse-a hin Job'in chonset abolpon, Pathen jong ngol hoitah in oimo achanpoi.