Read Thado Chin Job 10 Bible Online

Job 10 - Thado Chin bible

Job 10

¹Kahinna in kahinkhohi acholpitai; kakiphin naho hi keima chungtah-a ngamingting; kahinna-in lungna tah-in thu seitange.

²Keiman Pathen henga themmo neichan hih-in tinge; Ipijeh-a neilungsat khumham neimusah-in tinge.

³Nakhutna nasemsa hi bolgentheija, nahsahlouva koija, migilou ho kihouna chungjoh salvah dinghi nangma dinga phajo hitam?

⁴Tahsa mit tobang naneija? ahiloule mihem thilmu banga nangman jong namuham?

⁵Nangma hin nikhohi mihem hin nikho tobang ham? nangma hinkho kumho jonghi mihem hin nikho ho tobang hija ham?

⁶Hiti achu nangman kakhan gitlouna ho nakhol jinga, chule kachonset naho naholjing ham?

⁷keima khanggilou kahilou hi nangman nahen; chule nakhutna kona eihuhdoh theija koimacha aumpoi tihi nahei.

⁸Nakhut tenin einasema, chule kalimhi nasuhto-a neimehtoh ahin; ahijeng vangin nangman neisumang tan ahi.

⁹Geldoh in, nahenga kangeh ahi, nangman bonngan banga neisem ahin, chule leivui neisokit ding hitam?

¹⁰Nangman bongnoi banga neisunlhah hilou ham? chule bongnoiha banga neihatsah hilou ham?

¹¹Nangman vunle phen neitomin, chule gule thaguijin neikan chah-in ahi.

¹²Nangman hinkhole panpina chu neipen; chule neivil jingna chun kalhagao aching tupmin ahi.

¹³Chule hiche thilhohi nalungsunga naselin; hichehi nangma-ah aume ti kahei.

¹⁴Keima kachonsetle nangman neimelchih-in, chule nangman kakhan setna jong don louvin neikoipoi.

¹⁵Keima mikhangilou kanahile, ohe ada chu kahi! chule midih ana hijongleng khodah pong kate. Keima kiboina-in kadimtan; hijeh chun kahesohnahi hungvetan.

¹⁶Ajehchu hichehi apungcheh tai. Nangman keipi bahkai hangtah bangin neidelin, chule nangman kachunga kidang tah-in nakitahlang kitnin ahi.

¹⁷Nangman keima douna-in hettohsahna athah-in napodoh-in; chule kachunga nalunghanna napunbe sahsah-in; kikhelna le galkisat hi keimato aumkhom jinge.

¹⁸Ipijeh-a chu naobu-a kona chu neihinpuidoh hitam? Ohe, kalhagao chu kanalha hihen, mit khatchan jong einamu da hitale!

¹⁹Keima ana umkhalou tobang hitadinga, naobu-a kona lhankhuh-a eikipo tading ahi.

²⁰Kanikho hi lhomcha hitalou ham? themkhat beh jong lungmonga kaum theina dingin, khongai jinlang, neichang lhatan.

²¹Kilekit lounading mun, muthim gamle, thina le-lim gama kache masangin;

²²Muthim gam, athima thim, chule thina le-lim, thupeh umtalou; chule vah jong muthim banga athim namun ahi.