Read Thado Chin Job 12 Bible Online

Job 12 - Thado Chin bible

Job 12

¹Chuin Job'in adonbutnin, aseije.

²Tahsanlel beihela nanghohi mipi chu nahiu ahitan, chule chihna toh nathitha diu ahi.

³Ahinla keiman jong nangho bangin hetna kaneije, keima nangho sanga noinungjo deh kahipon; hiche hohi ahelou koi umem?

⁴Keimahi Pathen kou-a amanjong ana donbutji, aheng akomaho i-sahlou mikhat tobang kahitan; midihtah nolnabei chu mi nuisatle ki-dah in aumtai.

⁵Alhudinga kigosa umpa chu nomsa tah-a umpan alunga adeilou thaomei tobang ahi.

⁶Gucha michomho ponbuh sungchu akhangtouvin, chule Pathen sulunghang ho jong huhtup in aumun; akhutnu Pathen'in apeneng chetnin ahi.

⁷Ahinla tun gamsaho khu dongun, chuteng amahon nahil untin; chule chunga leng vachaho jongkhu dongun, amahon naseipeh dingu ahi.

⁸Ahiloule leiset koma seijin, aman nahil intin, chule twikhanglen'a nga hon nahenga aphondoh diu ahi.

⁹Hichehi Pakai khutnin atoh ahin, hicheng jouse-a kona hetheilou koiham?

¹⁰Ama khutna ahingthei jouse hinna aumin; chule mihem jouse haina hu aumme.

¹¹Nakhangin thu jahding agotna, chule kammin a-anneh atepkhahji louham?

¹²Khanglui mite henga chihna aumin; chule hinkho sotna-a hetkhenna aume.

¹³Chihna le thahatna amatoh umkhom ahin, aman thumop le hetkhenthem theina aneije.

¹⁴Ven, aman aphelhan, akisadohkit theitapoi; aman mi akhakhumjin, chule akihongdoh kit theiji tapoi.

¹⁵Ven, aman twiho atingin ahile ago gamtaovin; chule aman hicheho chu ahinsol doh-in ahile, amahon leiset achup jengun ahi.

¹⁶Chihna thahatna chu amatoh auma ahin, akilhem lhapa le alhem lhapa chu ama-a ahi.

¹⁷Aman thumopthem ho chu achomgamjin, chule thutan ho chu mingol jeng asojitai.

¹⁸Aman lengho kikanna alhaplhah pehjin, chule konggah-in akongu agahpehjin ahi.

¹⁹Aman pipuiho chu galthil kichom bangin apuimangjin, chule amihatteu chu asumangjin ahi.

²⁰Aman ginchat theitahpa thusei chu atolmangin, chule tehse ho hetkhen themna jongchu alahmang pehjin ahi.

²¹Aman vaipoho chunga i-sah louna abunglhajin, chule mihatpa thahat chu alhahsam sahjin ahi.

²²Aman muthim lah-a thil kiselguh ho chu ahedohjin, chule thina le-lim chu vah-a ahin puidohjin ahi.

²³Aman namho apunsah-in chule asumangjin; namho chu asulenin chule apuijang kitjin ahi.

²⁴Aman leiset mihemte alamkaipao lungthim chu alahmang pehjin, amahochu lampi umlouna gamthip laija chun avamahthah sahjin ahi.

²⁵Amaho chu vah beijin muthim lah-a chun akimailele jiuvin; chule aman amaho chu pasal jukham bangin avalon lelesah jin ahi.