Read Thado Chin Job 13 Bible Online

Job 13 - Thado Chin bible

Job 13

¹Veuvin kamit tah-in hicheng jousehi amukhanai, kanakhangin ajan, chule hichu kahekhen tan ahi.

²Ipi nahetnum, hiche jengjong chu keiman kahei, keima nangho sanga noinungjo deh kahipon ahi.

³Tahbeh-in keiman hat chungnung hengah seijing ting, chule Pathen toh ngaito khomding kadeijin ahi.

⁴Ahin nangho jouthu bolho nahiuvin, nabonchao vin manlutna neilou louthem nahiuve.

⁵Oh, nanghohi thipbeh-in umthei tave leuchun! hichu nachihnao hiding ahi.

⁶Tun kalung ngaitohi ngaijun, chule kakam sunga kataonahi neingaipeh-un.

⁷Nanghon Pathen dinga gitlou na-a thu nasei dingu ham? chule amadinga lheplhahna thua nakihou dingu ham?

⁸Nanghon amachu nasan dingu ham? nanghon Pathen dinga nelkalna nanei dingu ham?

⁹Aman nangho naholdoh diuhi pha hinam? ahiloule mikhatnin michom dangkhat anelpeh banga, nanghon ama hitia chu nanelpeh dingu ham?

¹⁰Nanghon guhthima miho nasan ule, aman nangho napho teidingu ahi.

¹¹Chungnunna hin nangho natijat sah loudingu ham? chule ama ginna hi nachung uva chulouding ham?

¹²Na kigeldohna jouseu chu vutvai tobangbou ahi, natahsao jong leingan tobang ahi.

¹³Nangho thipbeh un, thu kasei theina dingin neichang lhaovin, kachunga ipi hunglhung ding hijongle hunglhung hen,

¹⁴Ipijeh-a kaha-a kasa hi kaketlhah-a, kahinkhohi kakhutna kakoi dingham?

¹⁵Aman eithat jongle katahsan jingding, ahin ama angsunga kalampihi katuhdet jingding ahi.

¹⁶Ama kahuh hingna jong hiding ahi; ajehchu miphalhem koimacha a-anga lutlou ding ahi.

¹⁷Kathuseihi phatechan ngai phaovin, chule kaphondoh hi nanakhangun ngaijun.

¹⁸Tun veuvin, kathuhi kagong tuptai; keima them eiki chanding ahi ti kakihetne.

¹⁹Keima eiseihu ding koiham? ajehchu tun keima thiptaleng kalhagao kalhadoh ding ahitai.

²⁰Kadingin thilni sehseh hi boldan, chutengle nangma-a konin keima kiselmang taponge.

²¹Keija konin gamlatah-in nakhut lamangin, chule natijat na-in neikichat sah hih-in.

²²Chutengle nangman neikouvin, keiman donbut nange, ahiloule keiman seijing ting chule neidonbut in.

²³Kachonsetna le kakhan gitlounaho hi ijatloma tama hitam? Kasuh khelnale kachonsetna hohi neihetsah-in.

²⁴Ipijeh-a namai nasela, namelma-a neingaito ham?

²⁵Nangin suhle touva huijin alhohle thingna chu nahe ngem ding ham? Chule chang kung gosa nadel lele ding ham?

²⁶Ajehchu nangman keima douna-in thilse tah najih-in, chule kakhang donlaija khangitlouna jouse chu neichansah tai.

²⁷Nangman kakeng jong thinghom sung ho-a nakoijin; chule kalamlhah ho jouse hoitah-in navejingin, nangin kakengto teni-a din teptena nakoijin ahi.

²⁸Chule keima thil monsa tobang kahin, ngetnin aneh chaisa ponse tobang kahi.