Read Thado Chin Job 15 Bible Online

Job 15 - Thado Chin bible

Job 15

¹Chujouvin Teman mi Eliphaz'in adonbutnin, aseije,

²Michingin pannabei thu aseidohjia, chule solam huija asung asuhdim ji-em?

³Aman phatchomna umlou thu kisei chu anel ding ham? ahiloule thilpha bolna theilou thu aseiding ham?

⁴Ahi, nangin kichatna napaimangin, chule Pathen anga taona nasutange.

⁵Ajehchu nakamin nakhangit louna aphondoh-a, chule doha lheplhahna lei chu nakilhen ahitai.

⁶Nakamin nangma themmo nachan ahin, keima kahipoi; henge, namuh-in nangma dounan thu ahettohsah-in ahi.

⁷Ana peng masapenah mihem chu nangma nahim? ahiloule mol le lhangho masanga ana kisema chu nangma nahim?

⁸Nangin Pathen thuguh chu najahkhah am? chule chihna hi nangma sehseh-in naneija nangaito ham?

⁹Keihon kahet louvu nangin ipi nahet em? keiho-a umlou nangin ipi hetthemna naneijem?

¹⁰Kalah uvah napa sanga gamchenga upajo, lukangle, tehsejo a-umui.

¹¹Pathen'a kona lhamona hohi nadinga thilneo ham? nadinga aguh-a um thil ipi umem?

¹²Ipi dinga nalungin nangma napuimang hitam? chule namit nin ipi aphet lhap lhap piham?

¹³Hitia chu nalhagao Pathen douna-a naleheija, chule nakama kona hitobang thuho hi naso dohsah hitam?

¹⁴ Mihem chu ipi hija theng tei ding hija ham? numeija kona penga chu chonpha teiding hija ham?

¹⁵Veovin, aman amithengte lah-a tahsana akoipoi; henge, ama mitmun van ho jong atheng pouvin ahi.

¹⁶Khan gitlouna twi banga donna mihem hi, ichanna lenjo-a thet umle theng lou jocheh-a hitam?

¹⁷Ngaijin, keiman navetsah-inge; chule kamu tah chu kaphon doh ding ahin;

¹⁸Miching hon apateova kona anaseiju, chule aselmang louvu;

¹⁹Hitobang miho henga bou chun leiset hi anakipen, gamchom mi alah uva vahlea aumpoi.

²⁰Mi khang gilou chun ahinkho lhum keijin natna athoh-in, chule ahinkho kum jat chu misugenthei pa-a akiselin ahi.

²¹Tijat umtah awgin chu anakhanga agingin; aphatthei laitahle mi sumangpa achunga hung lhung ding ahi.

²²Muthima kona kiledoh ding kahi ti aman atahsan joupon, aman alouna ding chemjam chu angah-in ahi.

²³Ama an holnan avah kimvelin, hoija uma hitam? atin, thimjin nikho gotsa chu ahungnai tai, ti ahen ahi.

²⁴Lungkhamna le lung genthei na-in ama akichatsah ding; leng khat galsat dinga akigot banga, amahon ama ajokhupdio ahi.

²⁵Ajehchu aman akhut Pathen dounan alhangdoh-in, hat chungnung pen douna-in amale ama aki suhatnin,

²⁶Ama, ama chungle angong chang chung gei, chule alum satah ho chunga chun alhailen ahi.

²⁷Ajehchu aman amai chu athaovin atomin, ataija chun athao akikhol khome.

²⁸Suhmanga umdinga gotsa, koimacha chen khah louna, khopi kamhelsa-a um inho-a chun ama achengin ahi.

²⁹Ama haodoh lou ding, anei agou jong umjing lou ding, aman leisetna hiche ho-a chu ninglhinna aneisot lou ding ahi.

³⁰Ama muthima kona potdoh talou ding; meikongin abahho chu aleo got ding, chule akama ahaina hu-a chu ama jammang ding ahi.

³¹Ama chu ahomkeo tahsan dinga kilhemlha-a hihih hen; ajehchu ama kilethuhna ding chu ahomkeo ahibouve.

³²Hiche hi ama phat masanga kisu bulhit ding, chuleh ama bah chu ana hing lou ding ahi.

³³Aman lengpithei banga amin lou agaho chu aholhah ding, chule apah chu olive banga apaidoh ding ahi.

³⁴Ajehchu miphalhem kikhomho chu kamhel ding, nehguhna houbuh chu meija kisumang ding ahi.

³⁵Amahon thilphalou naovop in avopmun, ahomkeo ahungsoh-in, lheplhahna chu a-oijuva akigongjin ahi.