Read Thado Chin Job 16 Bible Online

Job 16 - Thado Chin bible

Job 16

¹chuin Job'in adonbutnin, aseije,

²Keiman hitobang thil ho tamtah kajai, mi sugenthei dinga lhamon sah-a panga chu nangho nahiuve.

³Pannabei thuho hin akichaina aneijem? ahiloule ipin nasuh thouva hitia chu nadonbut ham?

⁴Nahinnao hi keima hinna khela hinga hileh, kenjong nangho bangin kaseithei ding ahin; nangho douna-a thuho kasei doh ding, chule kalu hi kathin khum ding nahiuve.

⁵Ahin kakamin nangho suhatning ting, kakama kona pot thu chun nahahsat nao angaijang ding ahi.

⁶Keiman seijong leng kahesohna hi oldom dehponte, chule keiman thoh thoh jong leng ipiham kanopna ding?

⁷Ahin, tun aman eithacholsah ahitan, nangin kagol kapai ho jouse nasuh kamhel ahitai.

⁸Chule keima douna-a hettohsah din nangman kapuma tivoijin neikoijin; chule kamaija hettohsahna hidin, katahsa agong lhan ahi.

⁹Aman alung hanna-a eibottelin, keima eihotai; aman kachunga aha eigel khumin; kamelman mitsal tengin eive-e.

¹⁰Amahon kachunga akamu lentah-in akah-un; isahlou tah-in kabengphe abengun; keima dounan amaho akikhom khomun ahi.

¹¹Pathen'in ama ngaisah lou mite henga eipedoh-in, khang giloute khutna eipaidoh tan ahi.

¹²Keima nom-in kana umin, ahin aman ahal halin eisuchiptan; aman kalollin jong eimanin, eithingin, ama bidoija din eitungdoh-e.

¹³Athal kap hon eium kimvelun, aman kakalteni khenlouhellin asukhenin; kathinkha tolla asung lhan ahi.

¹⁴Aman setna chunga setna-in eisusetan, kachunga milen mihat tah bangin alhailen ahi.

¹⁵Katahsa vou chunga hin khaodip pon kakikhun, chule leivui lah-a hin kaki asuboh tai.

¹⁶Kamai hi kaka kanan asan dohtan, kamitgeiho hi thina le-lim alange.

¹⁷Kakhut tenihi thildihlou imacha-a din kamangpon; kataona jong hi atheng ahi.

¹⁸Vo leiset, nangin kathisan hi vuhmang hih-in, chuleh kaka nahin mun neihih hen.

¹⁹ Chujongle tun, veuvin, keima hettohsahna chu van'a aume, chuleh kathu kichinna bu chu chungsanga aume.

²⁰Kagol tehon nasahmon eibolun; ahinla kamit lhihi Pathen heng lama along jinge.

²¹Mihem khat a-inheng dinga atao bangin, mihem khat dinga mikhat Pathen'a taopeh ding uma hile o!

²²Kum phabep ahung lhunteng, hung kile kit lounading mun'a chu keima kache ding ahitai.