Read Thado Chin Job 17 Bible Online

Job 17 - Thado Chin bible

Job 17

¹Kahaina hi akemtan; kahin nikho hojong alhasuhtan, keima dinga lhan khuh ho chu gotsa ahitai.

²Mi nelpeh ho chu kakoma um hilou ham? ami phin lunghang nao hi kamitnin avet lhih jing hilou ham?

³Tun, keima nanga dinga kitepna khat nin nei umsah-in; keima to kikhutsan ding chu koiham?

⁴Ajeh chu nangman alung thimu chu hetthem theina-a konin nasel mangpeh-in; hijeh-a chu amaho nachoisang louding ahi.

⁵Agol apaiho henga pachat lhem thuseipa chu, achate mit ngeijong khomulouva umding ahi.

⁶Mite seichah thei din jong aman eisem dohtan; chule phat masalaija chu min achil aset khum mi tobang kana hi.

⁷Kahesoh na jeh in kamit jong hi athimin, katibah hojong nilim kihei abangtan ahi.

⁸Milungdih hochun hiche hi kidang saovintin, themona neilou michu miphalhem dounan amale ama kitildoh inte.

⁹Michonphan alampi jong kituh chah intin, chule akhutho thengsella umsah jingpa chu hatcheh cheh ding ahi.

¹⁰Ahin nangho jouse vang, tun hungkile kitnun lang, hungun,; ajeh chu keiman nalah uva hin miching khat jong kamu doh joupoi.

¹¹Kahin nikhoho achetan, kathil gon hole kalunga kagelho jeng jong abonin achavaitai.

¹²Hicheho chun jan chu sun aso-un; muthim jeh-in khovah achome.

¹³Keiman ngah taleng, lhankhuh chu ka-in ahitan; ka jalkhun chu muthim lah-a kakisemtan ahi.

¹⁴Keiman monmang thei jah-a chun, nangma kapa nahi; lung jah-a chun, nangma kanule kasopinu chu nahi, kati.

¹⁵Achutile tu-a kakinepna chu hoija umtam? kakinepna vangchu kon amuding hitam?

¹⁶Leivui toh kichoh halla kicholdo kahung hitenguleh, amaho aki khahtup kotong lam jona chu chesuh ding ahiuve.