Read Thado Chin Job 18 Bible Online

Job 18 - Thado Chin bible

Job 18

¹Chujouvin Shuh mi Bildad nin adonbutnin, aseije,

²Thuho nachaina ding chu itih chan hiding ham? melchih-in, chujouteng keihon seijuvinge.

³Ipijeh-a keiho gamsa-a eiki simuva, chule namitmu-a man mo-a eikigelu ham?

⁴Alung hanna-a amale ama kimal teljia; nang dinga leiset hi kidalha ding ham? chule songpi chu aumna-a kona kichondoh ding ham?

⁵ Henge, mi khang gilou meivah chu kisumit ding, chule ameikonga meisi chu vahdoh louding ahi.

⁶Ahoubuh sunga meivah chu thimding, chule athaomei chu ama puma kisuhmit thading ahi.

⁷Athahat lai kalsena ho chu kisu chom ding, amatah thumopna chun ama asotlhah ding ahi.

⁸Ajeh chu amatah kengchun ama lenthang sunga akhumlutna, chule ama thang kikam chunga vahlea ahi.

⁹Thangin akhotal jum-a akhi khah ding, chule gucha michompa chun ama ajo ding ahi.

¹⁰Ama dinga thang kikam chu leinoi'a akivuijin, athangchu lampia akidoi.

¹¹Tijatna hon ning jouse-a ama akichatsah ding, akeng geija ahin no ding ahi.

¹²Athahatna chu gilkel thohna hung hintin, chule manthah na chu ama-a gotsa hiding ahi.

¹³Hichun atichung vun thaneina chu aval lhum ding; thina peng masapen ngeichun athahatna avallhum ding ahi.

¹⁴Ama thil tahsana chu a houbuh sunga kona kila dohding, hichun ama tijat umtah lengpa henga ahin lhut ding ahi.

¹⁵Hichu ama houbuh sunga hung cheng inte, ajeh chu ama-a khatcha ahitapoi; ama chena chunga chu meile kaat kithejal ding ahi.

¹⁶Ajung ho chu noilanga gopgamin tin, chule chung langa abah chu kisat lha ding ahi.

¹⁷Ama kigeldoh jingna chu leisetna kona mangding, chule aman khopi lamlena min kiphah pohna aneilou ding ahitai.

¹⁸Ama khovah-a konin muthim lah-a nodoh-in umintin, chule vannoi'a kona kideldoh hiding ahi.

¹⁹Aman amite lah-a achapa le asopiten ahin chapate aneilou ding, chujongle achena sung ho-a ahinga um umlou ding ahi.

²⁰Ana che masa hon tijatna ana nei banguva, ama nunga hung ho chu ama nikho nileh kidang asah diu ahi.

²¹Tahbeh-a hitobang hi mi khang gilouho chena chu ahin, chule hiche hi Pathen hepha louho mun chu ahi.