Read Thado Chin Job 19 Bible Online

Job 19 - Thado Chin bible

Job 19

¹Chuin Job'in adonbutnin, aseije:

²Nanghon itihchan kahina hi nasuhgenthei uva, chule thua ahal hala suhchip ding neigotnu hitam?

³Hiche somvei jenhi i-sah louvin neibolun; kahenga hetkhah lou mibanga nachonu hi jachatnan naneipouvin ahi.

⁴Chule bolkhel kanei hijeng jongle, kadihlouna chu keima-a umding ahi.

⁵Tahbeh-a keidouna-a nangho kichoisang nahiule, i-sah louva eikibol nahi keima douna-a nelkalna mang nahiule;

⁶Tun heovin, Pathen'in keima eisot lhah ahitan, chule alen thang chun eiumkivel ahitai.

⁷Veovin, keiman dihlou na-a konin kasamin, ahin eikijah peh tapoi; hatah-in kasamin, ahinla thutana ima aumpoi.

⁸Keima kache thei louna din, aman kalamlhah na-ah pal agenin, chule kalam lhahna-a thim ajin sah-in ahi.

⁹Aman kaloupina eiho lhah peh-in, chule kalua konin lallukhuh aladoh-in ahi.

¹⁰Aman keima lam jouse-a eisumang tan, keima akichai kahitai, chule aman kakinepna hi thingphung banga abodoh ahitai.

¹¹Aman keima dounan alungsatna jong akoudoh sah-in, chule amelma holah-a khat bangin eisimtai.

¹²Agalsat mite ahung khomun, keima douna din lampi akisemun, chule kahoubuh kimvela gebuh akisonun ahi.

¹³Aman kasopite keija konin gamlatah-in akoijin, chule keima kimel hetpi hojong tahbeh-a keija kona achoma umdoh ahitaove.

¹⁴Ka-in kote alosamtan, chule kaki ngailutpi gol le paihon eisumil taovin ahi.

¹⁵Keima in'a cheng mite le kasoh numei hon gamchom min eisim taovin; amitmu uvin gamchom mi kahitai.

¹⁶Keiman kasohpa kakouvin, ahin aman eidonbutpon; kakam tah-in ahenga kataovin ahi.

¹⁷Kahaina hu hi ka-inneipi-a dingin ajatchom tan, ka-insungmite dinga jong deimo-um kahitai.

¹⁸Ahi, khangdong chapanghon i-sah louvin eibolun; kakipatdoh in ahile, keidouna thu aseijun ahi.

¹⁹Kaki ngailutpi tah golle paihon eihot bolun; kangailut ho chu keima douvin apang taovin ahi.

²⁰Kagu hi kavunle kaphe toh akikamat tan, keima kahani vun sehseh toh hoidoh kahi.

²¹O nangho kagol kapaiten neilungset nun, neilungsetnun; ajeh chu Pathen khut chun eitong khatan ahi.

²²Ipi dinga Pathen'in eibol genthei banga nanghon neibol genthei uva, katahsa thoh nahohi phaset nasah loulai uham?

²³Ohe, tun kathu hohi sutlutnin umtavele! Ohe, hiho chu lekhabua kitat doh-a hita vele!

²⁴Hiho chu thih lekhabu sutna mol chule ngenin songpi chunga, a-itih-a dinga kigeitong hitavele!

²⁵Ajeh chu eilhatdohpa chu ahingin, chule ninunung lamle leiset chunga hung ding ding ahi, ti kahei.

²⁶Chule kavun bannin hiche katahsa hi lunghon ne manghel jeng jongleu, katahsa tah-a Pathen chu kamu ding ahi.

²⁷Kasunga kalung thimgil jun manghel tajongle, keima-a dinga ama chu kamu ding, chule kamit teni-a kavet ding, adang ima kamulou ding ahi.

²⁸Ajehchu keija thiljouse bul akimudoh chu namudiu ipidinga eihon ama isuh genthei diuham? nati diu ahi.

²⁹Chemjam chu nanghon kichaovin; ajeh chu thutana aume ti nahet theina dinguva, lung hana chun gimbolna chemjam ahin lhut ding ahi.