Read Thado Chin Job 2 Bible Online

Job 2 - Thado Chin bible

Job 2

¹Nikhathi Pathen chapate chu Pakai anga ahung kikhomkit taovin, chule amaho lah-a chun Satan jong Pakai angah ahunglhan ahi.

²Chule Pakai chun Satan jah-a, hoija hungkon nahim? ati. Satan'in Pakai chu adonbutnin leiset chunga suhle tunga kavalea chule chungle noi kakoptoa kahung ahi, ati.

³Chule Pakai chun Satan jah-a, kalhachapa Job khu iti nagellem? Leiset chunga michamkim michondih Pathen ginga chule setnalam nungsun jing amatobang aumpoi. Nangman ajeh beija ama suhmang dinga ama douna-a neitildoh vangin, aman achondihna lhadeh louvin atuhchah jing nalaije, ati.

⁴Chuin Satan'in Pakai chu adonbutnin, vun khella vun, henge, min aneijouse ahinna lhengin pente.

⁵Ahin tun nangman nakhut lhangin lang agule aphe tongkha lechun aman namaichang tah-a nangma gaosap tannate, ati.

⁶Pakai chun Satan jah-a, ven, ama nakhutna aume ahinla ahinna vang hoijin, ati.

⁷Hitichun Satan chu Pakai angsunga konin achedoh-in, chule Job chu akengtoa pat alujang geijin uilut khohtah-in atomsah tai.

⁸Chule aman akikhot nadingin bel halkhat alan, vut lah-a chun atoutai.

⁹Chuin ajinu chun ajah-a, nachondihna chu nakolchah nahlaijem? Pathen chu gaosap minlang thijengtan, ati.

¹⁰Ahin aman amanu jah-a nangman numei ngolkhat thusei bangin thu naseije. Ipiham? einin Pathen'a kona apha jeng ikisana, aphalou kisan louva i-um dingham? Hicheng chunga hin Job'in akamin thuse aseipoi.

¹¹Tun Job golte thumho chun hiche thilse jouse hi ama chunga achutai ti ajah phatnun, aumna cheh uva konin ahungun; amaho chu Teman mi Eliphaz, Shuh mi Bildad, chule Naamath mi Zophar ahiuve. Amaho chu ama lunghempi dingle lhamon ding chun akitem toh-un ahi.

¹²Chule amahon gamlatah-a avetnuva amachu ahettheilou phatnun amaho awging tah-in akaptaovin; chule amahon asangkhol cheh-u chu abottelun, chule van lama aluchung uva leivui atheuvin ahi.

¹³Hitichun amahon amachu ni sagi le jan sagi tollhanga atoupiuvin, koimachan kamcheng khatchan jong ahouloh pouve; ajehchu amahon athohgim nasatah chu amuvin ahi.