Read Thado Chin Job 20 Bible Online

Job 20 - Thado Chin bible

Job 20

¹Chuin Naamath mi Zophar'in adonbutnin, aseije;

²Hijeh chun kalunggel hohin eidonbut sah-in, hiche thua ka kinon ahi.

³Keima ima eikisahlouna thu kajan, kahetthem theina lhagao chun donbutnin eitin ahi.

⁴Leiset chunga mihem aki koija pat, nangman hiche thului hi nahetlou ham?

⁵Hitia chu migilou kichoisang na hi chomcha bou ahin, chule miphalhem kipana jong mitphetkah bou hilou ham?

⁶Alul nachun vanho chan pha henlang, aluchun meibol ho lah phajongle;

⁷Ama a-imatih chana a-eh banga mangthah ding; ama anamu kha-a miho chun, ama hoija um hitam? atidiu ahi.

⁸Ama mang banga leng manga, kimudoh lou ding ahitan; jana gaothilmu banga ama delmanga umding ahi.

⁹Ama anamua mit jong chun ama amukit tah louding; chujongle ama ana-umna mun jong chun ama amukit lou ding ahitai.

¹⁰Achaten mivaicha lunglhaina ding hin holuntin, chule akhutnin athilhou alepeh kitding ahi.

¹¹Aguho chu akhang dong laija chonsetna adimin, hiche chu amato leivui lah-a luptha ding ahi.

¹²Gitlouna chu a akam sunga lhumlheh henlang, aman hichu alei noija seljongle;

¹³Aman hichu khendoh hen, chule notthap dahen, akamsunga chuti koiden tajongle;

¹⁴A-oija um anchu akikhelin, asungah gulse thinkha asohtan ahi.

¹⁵Aman haonaho aval lutnin, chule ahin lohdoh kit ding; Pathen'in a-oija kona ahin paidoh ding ahi.

¹⁶Aman gulseho gu achepding; gulse leijin ama atha ding ahi.

¹⁷Aman vadungho le twisohho, khoiju le bongnoi lona vachadung ho amulou ding ahitai.

¹⁸Aman acholna man alepehdoh kitna, chule hichu aman aval lhum louding; athil nei dungjuija alepeh kitna jong hiding, aman hichea chu lung lhaina anei louding ahi.

¹⁹Ajeh chu aman mivaicha agotchepmin, anungsunin; chule aman asahdoh hilou in chu pumhatnin alapeh-in ahi.

²⁰Thonlou hella aman asunga damna aneilou ding, chule angaichat ho imacha ahuhdoh jou louding ahi.

²¹A-anneh na-a amoh kidalha khatcha umlou ding; hijeh-a chu koiman aphatna amulouding ahitai.

²²Aninglhina pentah chun ama agentheisah ding, khang gilou ho khut jouse chu achunga hung chuding ahi.

²³A-oipoh suhdim ding agot petle, Pathen'in alungsatna chu achunga ahin selhah-a, a-anneh laitah leh hichu achunga go banga julha ding ahi.

²⁴Ama thih-a kisem manchah-a kona jam ding, chule thihtah-a kisem thal chun ama asut pailet ding ahi.

²⁵Akiloidoh-in, atahsa-a kon chun ahung dohtan ahi; ahi, chemjam val lahlah chu athinkha-a konin ahung doh-in; tijat umtah ho chu achunga achutai.

²⁶Muthim jouse chu guthim muna selmanga umding; huijin asemmit joulou meikongin akah vamding; aponbuh sunga kidalha chu ama dinga natna hiding ahi.

²⁷Van'in ama khangitlouna chu hin phongdoh-in tin; chule leiset chu ama dou dinga hung thoudoh ding ahi.

²⁸A-insung khantouna chun adalhah ding, chule athilkeo ho chu Ama lungsatna nikhole long mang ding ahitai.

²⁹Hiche hi migilou pa chanding Pathen'a kon chu ahin, chule Pathen'in ateppeh goulo chu ahitan ahi.