Read Thado Chin Job 21 Bible Online

Job 21 - Thado Chin bible

Job 21

¹Ahinla Job'in adonbutnin, aseije:

²Kathusei hi lunglut tah-in ngaijun, chule hiche hi nangho kilhamona hihen.

³Keiman kasei theina din thoh hamham tadiuvin; chule kasei chai tengle nei nelpeh naovin nate.

⁴Keima vang, kakiphina hi mihem lama ham? chuti chu hia ahile, ipi dinga kalhagao suhboija umlou ding ham?

⁵Neimel chih unlang kidang saovin, chule nakhut nun nakam simun.

⁶Keiman kageldoh teng jongle kati ajan, chule katahsa hi akithing jin ahi.

⁷Ipi dinga migilouhi hing jinga, hung tehji-a; chule thahat thaneitah hijiuva ham?

⁸Achateu chu amaho mitmu tah-in amaho toh phudoh than aumin, chule achilhahteu chu amaho maikoh-a phudoh-in aume.

⁹A-in hou chu kichatna-a konin ahoidoh-in, achunguva Pathen lungsatna moljong achujipon ahi.

¹⁰Abongchal houvin anou ahinsah-un, athona aumpon; abongpiu houvin anou ahingun, anou adalha khapon ahi.

¹¹Amahon achateu chu ganchahon bangin asoldoh jiuvin, acha teo alam alam jiuvin ahi.

¹²Amahon khongcha le selangdah akichoijun, tumging kitumgin na-a chun akipah-un ahi.

¹³Amahon ahin nikhou chu haosatnan amang jiuvin, chom louvin lhan khuh-a achesuh ji taove.

¹⁴Hijeh chun amahon Pathen henga, keiho-a konin potdoh tan; ajeh chu nalampi ho hetkhen theina chu keihon kangaicha pouve, atiuve.

¹⁵Keihon kajendiu Hat chungnung amachu ipiham? Keiho ahenga kataovule ipi phatchomna kanei diuham?

¹⁶Veovin, athilu chu akhutnuva aumpon; migilou thumopna chu keija konin gamla tah-in aumin ahi.

¹⁷Mikhang gilou thaomei chu ichana kimutmit matchet jinga hitam! chule amanthahna chu achunguva ichana lhung matchet hitam! Pathen'in alungsatna-a lung gentheina hi ahom dohjie.

¹⁸Amaho huipi masanga chang kong gosa tobang ahiuvin, chule hui leh gon apohmang changsi tobang ahiuve.

¹⁹Pathen'in amapa khansetna chu achateuva din akholpehjin, amapan ahetthei nadin lethuhna apejin ahi.

²⁰Amit tenin ama kisuh mangna chu amuding, chule Hat chungnung lungsatna chu adon ding ahi.

²¹Ajeh chu ahin nikho lhajat ho akimlaitah-in sattanin umtaleh, anunga ipi nopna insunga anei ding ham?

²²Aman mi chunglama umho thu atanji-e ti munasa-a, Pathen chu hetna kon ahil dingham?

²³Mikhat chu lung nomsa chamkimin, athalhin laitah-in athi jin ahi.

²⁴Anoi teni chu noitwi adimin, chule aguho chu lhintwi adimin ahi.

²⁵Chule mi abangchu hinkho hahsa tah-in athijin, kipah-in ima anekha pon ahi.

²⁶Amaho chu leivui lah-a thakhatna lumdiu, chule lungin amaho atomchah ding ahi.

²⁷Veovin, keiman nalunggel hou, keima douna-a thilgon dihlou nangaito hou jouse chu kahen ahi.

²⁸Ajeh chu nanghon, leng chapa in chu hoiche hija? chule migiloute chenna mun chu hoilai ham? nati uve.

²⁹Lampia chelea miho chu nanghon nadoh khah lou uham? chule amaho melchihna chu nahet lou uham?

³⁰Mikhang gilou chu manthah nikho-a dinga kikoija hilouham? amaho chu lunghan nikho-a hung kipuidoh ding ahiuve.

³¹Koiham alampi ding amaikoh-a phondoh peh thei dinga? chule kon athilbol na chunga lethuhna apeh ding ham?

³²Hijeng jongle ama chu lhan khuh-a kipui ding, chule buikhuh sunga umding ahi.

³³Phaichama leilhang ho chu ama dinga lhumtah hiding, amasanga simjoulou miho ache banga, mitinin ama nungchu ajui ding ahi.

³⁴Achutile nathil donbut naovahin jouthu aume ti namunasaova, ipi dinga pannabei ja neilhamonu ham?