Read Thado Chin Job 22 Bible Online

Job 22 - Thado Chin bible

Job 22

¹Chujouvin Teman mi Eliphaz'in adonbutnin, aseije;

² Achinga jong chu ama dinga bou phachomthei ahijeh-in, Pathen'a dinga mihem hi phachom dingham?

³Nangma chonphatna hi Hat chungnung dinga lunglhaina hinam? ahiloule nalampi ho nachamkim sahna hin ama aphatchom sah hinam?

⁴Nangma nagin jeh-a aman napho ding ham? ama nangto thupi tanna-a lutkhom ding ham?

⁵Nakhan gitlouna hi lentah hilou hija, nakhansetna hohi akhon nabei hilou ham?

⁶Ajeh chu nangin nasopipa-a konin pannabei jin kitepna thil nala-in, chule aponsil ho nahoh lhan sagoh keovin naum sah-in ahi.

⁷Nangin thachol techu donding twi napepon, chule changlhah chu agilkel ho-a dingin naphalpon ahi.

⁸Ahin mihatpan vang leiset aneijin, hia chun gin umtah mihem chu achengin ahi.

⁹Nangin meithai ho chu khutgoh keovin nasol mangin, chule paneiloute thahat chu aki subong tai.

¹⁰Hijeh chun nakim vela thangho akikamin, hetmanlou kichatnan nasuboi tai;

¹¹Ahiloule kho namu thei louna din thim ajingin; chule twisoh chun nachup tan ahi.

¹²Pathen hi vanchung sanga um hilou ham? chule ahsi ho sandan khu vetemin, amaho iti sanna sang hitaovem!

¹³Chule nangin, Pathen'in iti ahet hija? aman meipi thim lah-a thu iti atan theiham? tin naseijin ahi.

¹⁴Meilhang satah ho khu aman amuthei louna dinga akhukhuma pang ahin; chule ama van'a avahkimvel lejin ahi.

¹⁵Mi khang gilouvin ajotji lamlui chu namel chihji em?

¹⁶Hiho chu aphatnu lhin masangin satlhah-in aumjin, akingapna bul chu twisoh-in achuptai.

¹⁷Hiho chun Pathen henga, keiho-a konin potdoh-in, Hatchung nungin amaho-a dinga ipi abol thei dingham? atiuve.

¹⁸Hijongle aman a-in ho chu thilphan adippeh-in; mikhang gilou thumopna vang chu keija kona gamlatah ahi.

¹⁹Michonphan hichu amun akipahjin; chule themona neilou michun, i-sah loutah-in anuisat khumjin ahi.

²⁰Hichan chun eiho neilegou suhmangin aumpon, ahinla amaho-a amoh chengse meijin akavamtai.

²¹Tun nangma amatoh kiheton lang, chule lung mongin umin; hichun nangdinga thilpha ahin lhut ding ahi.

²²Nahenga katao ahi, akama kondoh danthu chu kisanin, chule athu chu nalungthim sunga khol khomin.

²³Hat chungnung pen henga nakile kitna ahile, nangma kisadoh-in natin, nangin khansetna chu nahoubuh ho-a kona gamla tah-a nakoi mang ding ahi.

²⁴Chuteng sana chu leivui banga nakhola, chule Ophir sana chu vachadunga songho banga nakhol khom ding ahi.

²⁵Hiteng chule Hat chungnung chu nahongbitna hintin, chule dangka ninglhing setna naneiding ahi.

²⁶Chutengle nangman Hatchung nungpen nachun kipana neijin natin, chule Pathen lama namai nangat ding ahi.

²⁷Nangman ahenga taona neijin natin, aman nataona angaiding, chule nakitepna chu napeh ding ahi.

²⁸Nangman thupeh khat jong naphondoh ding, hichu nachunga tohdoh-a hung umding; chule vahchun nalampi ho asalvah ding ahi.

²⁹Mihem hi akisuh lhah tengle, kitundoh-na aum jie, tia naseiding; aman mi kineosah chu ahuhhing ding ahi.

³⁰Aman themona neilou mi chu ahuhdoh ding ahin, nakhut teni thenna-a chu kihuhdoh ahi.