Read Thado Chin Job 23 Bible Online

Job 23 - Thado Chin bible

Job 23

¹Chujouvin Job'in adonbutnin, aseije.

²Kakiphina hi tuni chanin akha-in; kakhoisatna sangin kahesohna hi agihjon ahi.

³Oh ama touna mun ngeija kahung lut theina dingin; keiman ama chu hoijah kamu doh thei tadem?

⁴Keiman amasanga kachung thu lhut ingting, chule kakam sung nelkal na-a kadip ding ahi.

⁵Aman eidonbutna ding thuho chu kihetning ting, chule kahenga asei ding chu ipi ahi, kahetchet ding ahi.

⁶Aman athahat thunei na-in kachung thu eiseipeh dem? Chutiponte, aman keija hi thahatna ahinkoijoh ding ahi.

⁷Michonphan chua chu amato thu aseikhom ding; hitia chu thutana-a kona keima a-imatih-a dinga huhdoh kahiding ahitai.

⁸Veovin, keima malama kachen, ahin ama hia chun aumpoi; nunglama kachen, ahin ama kahe dohpon ahi.

⁹Aman akhut veilama na atongin, ahin ama kamupon; ama kamu theilouna dingin akhut jetlama akiselin ahi.

¹⁰Ahin aman kakalsena lampi ahen; aman eipatep teng keima sana toh kahungbah ding ahi.

¹¹Kakeng phangin ama kholhahna ho achonin; ama lampi chu kaching jingin, kavah doh khapoi.

¹²Ama thupeh-a konin keima nungjong kanungchon kitpon; ama kamsung thuchengho chu ka anneh thilkhoh pen sanga twijon kangai sangin ahi.

¹³Ahin ama lungthim khatseh pu ahin, aman angaitoa bolding ati chu kon aheikon jouding ham?

¹⁴Ajehchu keima dinga kitepsa thil chu aman atongdohjin, chule hitobang thilho chu akoma tamtah aume.

¹⁵Hijeh chun lungkhamin amasangah kaumin; kangaiton ahile keiman ama kakichan ahi.

¹⁶Ajeh chu Pathen'in kalung asu nemin; chule Hatchung nungin eilung khamsah-e,

¹⁷Ajehchu keima muthima kona suhmang kanahipon, kamai jong muthim ana khu khum sahpoi.