Read Thado Chin Job 24 Bible Online

Job 24 - Thado Chin bible

Job 24

¹Ipi dinga phat hi hat chungnung pa-a kona selmanga aumlou munasa-a, ama he-a miten ama nikho ho chu amulouvu ham?

²Mi konkhat in gamgi achonji-un; amahon pumhatnin gancha hon alamang jiuvin, hia chun akivah jiuve.

³Amahon paneiloute sangan chu ahoi mangun, meithai bongchal chu kitepna thil dingin amang jiuve.

⁴Amahon angaichate chu lampia konin anodoh-un; leisetna vaichate chu akisel mangji taove.

⁵Veovin, nelgama gam sangan bangin, amaho anatoh naovadin apot doh-un; neh ding holin akipat doh-un; gamthip gam chun amaho dingle achateu dingin neh asodoh-e.

⁶Amaho amitakipmin louva chang aki-at cheh-un; chule amahon khansetna lengpiga chu aloh khomun ahi.

⁷Amahon sagohkeo chu pon beijin ajan gesah-un, hitia chu amaho daplaija silding neilou ahiuve.

⁸Amaho molsang ho-a gotwijin akotnun, kiselna ding deinan songpi akolun ahi.

⁹Amahon pa neilou chu anu-anga konin asat lhaovin, vaichate-a konin kitepna thil ala jiuve.

¹⁰Amahon pon beijin sagoh keovin ache sah-un; chule gilkelpa-a konin changphal alah mang peh-un;

¹¹Abang hou sunglama thao aheh-un, alengpiga hou achilun; dangchah athoh-un ahi.

¹²Mihem hi khopi sunga konin khoisan aumun, akimavo miho hinna ataovin; hijongle Pathen'in amaho chu ngaipeh-in aneipoi.

¹³Amaho khovah douna-a kiphin mite ahiuvin; alampihou ahethei pouvin, hiche lampia chun umjong aumthei pouve.

¹⁴Tolthat ho khovah le athouvun, vaichale ngaicha jingte athat jiuvin, janle gucha abangun ahi.

¹⁵Jonthanhoi bolnom mit jongchun khothim angah jingin, koiman eimu ponte tin, amaiso akikhelsah jin ahi.

¹⁶Sunteng melchihna akisemu in hochu janteng avut jiuvin; amahon khovah kiti ahepouve.

¹⁷Ajehchu amaho din jingkah chu thina le-lim toh abangin; khat touvin amaho ahetnule, thina le-lim kichan aumjiuvin ahi

¹⁸Ama twi banga ganga ahin; achanu chu leisetna gaosap ahin; aman lengpilei ho lampi chu amuphapon ahi.

¹⁹Gamgot le nichang satnin buhbang twiho ajunsah tan, hitobanga chu lhankhuh-in jong michonse te chu abol ahi.

²⁰Naobun amachu asuhmil ding; lungin amachu nomsa tah-a kivahnan neijintin; ama geldoh-a umtalou ding, chule khan gitlouna chu thingbanga phuhlhuh-a umding ahi.

²¹Aman cha neilou achinga chu kivahnan mangchan tin; meithai chunga thilpha abolpeh louding ahi.

²²Aman mihatpa jong chu athaneinan akaijin; ama akipat dohjin, chule hinkho kicheh tah mihem koiman aneipoi.

²³Akicholdo nadin, bitkeicha aumna ding kipe jongle, amit chun alampi hou avetjing ding ahi.

²⁴Amaho phat chomcha dinga kichoisang ahiuvin, ahinla suh nemin aumin akichaijitaove; amaho alampiuva kona midangho banga kimandoh ahiuvin, changvuileh kisih tan banga kisattanji ahi taove.

²⁵Chule tun hichu ahilouva ahile, koiham keima eijousah-a, chule kathusei pannabei ahi tiding chu?