Read Thado Chin Job 27 Bible Online

Job 27 - Thado Chin bible

Job 27

¹Hiche chung chon chun Job'in athulem sei ajomin, aseije;

²Kathu kitana ding eilahmang peh-a hingjing Pathen, chule kahinna suboija Hat chungnung;

³Kasunga haina thei aum laise le, Pathen lhagao kanahkohom teni sunga aum laisen;

⁴Kakamin khangitlouna thu sei pongting, kaleijin jong lheplhahna thu phongdoh ponge.

⁵Nangma them kachansah ding Pathen anompoi; kathi kahse-a keiman kadinna kachondoh louding ahi.

⁶Kachon phatna hi tuhdet jinging ting, kalhaso louhel ding; kahin lai chansen kalung thim hin eithemmo sah louding ahi.

⁷Kamelma chu mikhang gilou tobang hihen, keima dou dinga hung kipatdohpa chu chonpha louteto banguhen.

⁸Ajehchu Pathen'in ahinna alahdohteng, phatchomna neijongle mipha lhemin ipi kinepna aneiding ham?

⁹Lungkhamna achunga ahung lhunteng ataona chu Pathen'in angaipeh na dem?

¹⁰Hat chungnungpa-a chun amatah alung lhaina dem? phattinin aman Pathen akou nadem?

¹¹Pathen khut thahat dan nangho seipeh-unge; Hat chungnungpa koma um chu keiman ka-imchah lou ding ahi.

¹²Veovin, nangho tah-in hichu namu taovin; achutile ipi dinga nangho nabon chaova hitia hi pannabei, nahiu hitam?

¹³Hiche hi mikhang gilouvin Pathen'a achan chu ahin, misugenthei ho goulo ding, Hat chungnung pa-a kon amudio chu ahi.

¹⁴Achateu apunna ahile hichu chemjam'a lou ding bep ahiuvin; chule achilhahteu chu changlhah-a oiva loudiu ahi.

¹⁵Ama nunga ana umnalai ho chu thi uva kivui diu; chule ameithai hou chun aka loudiu ahi.

¹⁶Aman dangka leivui bangin kholkhom henlang, kivona pon leiset bangin gong jongle;

¹⁷Hichu aman gong theijinte, ahinla hichu midih-in akivon ding, chule dangka chu themona neilou ho kihom diu ahi.

¹⁸Aman a-in chu maimom bangin asan, thil ngah-a pangpan akisah lhambuh bangbep ahi.

¹⁹Mihaopa chu lumintin, ahin ama gopkhoma umlou ding; aman amit ahahsahle, ama anaum tapoi.

²⁰Tijatna hon ama twibangin achuptan, huipin jan-in ama alhoh mangtai.

²¹Ama solam huijin apomangin, ama achemang tan; chule aumna mun'a konin khopi huijin alhoh mangtan ahi

²²Ajehchu Pathen'in achunga ahin selhah-a, ama akhendoh louhel ding; ama khutna kona ama lhasama jamdoh ding ahi.

²³Mihon ama khut abeh khumuva, chule aumna mun'a kona aphisanuva anodoh dingu ahi.