Read Thado Chin Job 28 Bible Online

Job 28 - Thado Chin bible

Job 28

¹Tahbeh-in dangka-a dingin akhuh aumin, chuleh sana-a dingin akilhit thengna mun aumin ahi.

²Thih hi leisetna kona kiladoh ahin; chuleh sum-eng hi song lah-a kona kiladoh-a kilhajol ahi.

³Ama muthim akhona geijin achen, muthim le thina le-lim changei songho chu agaholin ahi.

⁴Aman mihem umlouna-a le chotkhah louna mun'a leiko avutnin, mihem'a konin gamlha tah-in akikhaijun, suh le tunga akivat leuvin ahi.

⁵Leiset hi ahileh, hichea konhin neh ahungdoh-in, anoilang vang meikong tobanga hungsoh doh ahi.

⁶Hiche mun'a songho chu khisongdum ahin, chule hia chun sana di aumin ahi.

⁷Chungleng vachan ahetkhahlou, muthong mitnin amukhahlou, lampi khat aumin;

⁸Keipi bahkai nouvin achotkhahlou, keipi hangtah-in jong ahokhahlou lampi khat aume.

⁹Aman akhutchu songpi chunga akoidoh-in, aman molsangho chu abula konin alehkhup jenge.

¹⁰Aman songpiho lah-a vadung alaidoh-in, thil manlutah hojouse chu amitnin amun ahi.

¹¹Aman alonlet louna dingin twisoh ho chu atingin, chule anakisel thilho chu aman khovah-a ahinpodoh-in ahi.

¹²Ahinla chihna chu hoija kimu ding ham? Chule hetkhen themtheina munchu hoilai ham?

¹³Mihemin hicheho manlut dan chu ahedoh joupoi, ahiloujongle mihing gamachun hichu akimudoh jou dehpoi.

¹⁴Hiche chu keija aumpoi, tin twi thuhtah chun aseijin, hiche chu keija aumpoi, tin twipin aseije.

¹⁵Hiche chu sana-a jong chohjou ahipon, ahilou jongle hiche manding chu dangka-a jong lepjou ahipoi.

¹⁶Ophir sana mantam tah ahilouleh khisongdum manlutna toh tethei ahipoi.

¹⁷Sana le songval toh kibanga ahipon, chule sana-a kilhatheng thil mantam tah tojong lhehthei ahipoi.

¹⁸Songmantam san ahiloule twikohchang hojong gahmin phahthei ahipoi; ajehchu chihna manlutdan chu song mantam phapen sanga lujo ahi.

¹⁹Ethiopia khi song engtoh kibanga jong ahipon, ahilou jongle sanatheng manlutna tojong kibanga ahipoi.

²⁰Achutile chihna hoija hungkon hija, hetthem theina munchu hoilaiham?

²¹Ahingthei jousele mitmu jouse-a kon kisel ahin, chungleng vacha jouse-a kona akiselmang ahi.

²²Manthahnale thina-in, hiche chungchang thulhut hi kanakhang hona kajalhonin ahi, ati lhone.

²³Pathen'in hiche lampi chu ahekhenin, chule aman hiche laimun chu ahen ahi.

²⁴Ajeh chu aman leiset kichaina ding gei aven, vannoi pumpihi amun ahi.

²⁵Huidingin agih tena ding asemin, chule aman twiho chu agih tena-a aten ahi.

²⁶Aman go henga thupeh anapeh-a, van ginle kolphe dinga lampi anasemachun:

²⁷Chua chun aman chihna chu amun, aphong doh-in; aman agongin, henge, chule hichu aholdoh-in ahi.

²⁸ Chule mihem jah-a chun aman aseijin, veuvin Pakai ginhi chihna chu ahin, chule setna a kona jamdoh chu hetkhen themna chu ahi.