Read Thado Chin Job 29 Bible Online

Job 29 - Thado Chin bible

Job 29

¹Chukal valin Job'in athulem ajompeh-in aseije.

²O Pathen'in eichintup nikhoho, achesa lhaho-a chu keima ana uma hileng;

³Kalu chunga athaomei anavah-a, chule amavah-a muthim lah kanajotle lai;

⁴Kakhang donlai nikhoho, Pathen thuguh chu kahoubuh chunga aumlai;

⁵Hatchung nungpen pan kakoma eiumpia, kachate kakimvela ahung umlaiju;

⁶Kakholhah naho bongnoi thaova kana soplai, chule songpin kadinga thaotwi vadung long banga asodohsah lai;

⁷Khopi sung kotpi phunga kapotdoh le-a, khopi lamlen laija katouna kadole laichun!

⁸Khangdong hon eimuvin, akiseluvin, chule tehse ho chu akipat doh-un, ading jiuvin ahi.

⁹Pipuiho chu ahoulim laiju atang jiuvin, chule akhutnun akam akisip jiuve.

¹⁰Milen milal ho athipchet jiuvin, chule aleiju chu adanguva abehjin ahi.

¹¹Nakhangin eijahteng, phatthei eiboh-in, mitnin eimuteng, hichun keima hettohsahna eipen ahi.

¹²Ajehchu keiman mivaicha pengpenga umle, paneiloute, chule kithopi ding neiloupa chu kahuh doh-in ahi.

¹³Mangthah dinga umpa phattheina chu keima chunga ahungchun, keiman meithainu lungsung chu kipanan la kasah sahjin ahi.

¹⁴Chonphatna chu kakivonin hichun eitomin, kathutan lhah chu sangkhol len le lukhuh tobang ahi.

¹⁵Mitchodin mit kanahin, kengbaiho din keng kanahi.

¹⁶Mivaichate din apau kahin, chule kahet khahlou thu chu kaholdoh jin ahi.

¹⁷Khang giloute khagu chu kasuhboh peh-in, chule akamuva konin anehdoh houchu kasadoh peh-in ahi.

¹⁸Chuin keiman, neldi banga kahin nikhohohi kapunsah-a, kabuh sunga kathi ding ahi, kati.

¹⁹Twipanga kajung ajamin, kabahho chunga jankhon daitwi alhan ahi.

²⁰Kaloupina chu keija athah jingin, chule kakhutna kathalchang chu akisuthah jinge.

²¹Mihon kahenga anakhangu ado-uvin, chule angah jiuvin, kathumop teng athipchet jiuve.

²²Kathusei joutengle amahon aseikitji tapouvin, chule kathusei chu achunguva achun ahi.

²³Gotwi angaichat bangun keima eingaicha jiuvin; gotwi nunung ngah bangin, amahon akamu akalen jiuve.

²⁴Keiman amaho nuisat jongleng, amahon atahsan loudiu; chule kamaiso vah chu amahon asulha pouvin ahi.

²⁵Alampihou kalhen peh-in, apipu uvin kapange, chule sepai lah-a lengpa bangin kaumin, lhasete lhamonsah khat bangin kaumin ahi.