Read Thado Chin Job 3 Bible Online

Job 3 - Thado Chin bible

Job 3

¹ Hicheng jouhin Job akam kan apenni chu agaosaptai.

²Chule Job apaodoh-in hitin aseije,

³Kapenna nikho chu mangthah hen, chule naosen pasal khat akivoptai tia kiseina janchu mangthah hen.

⁴Hiche nikho chu muthim hihen, chunglama konin Pathen'in ngaisah dahen, hiche nikho chu vah injong salvah dahen.

⁵Hiche nikho chu muthimle thina limmin kaikhumhen, meipin achung khukhumhen; muthim lhangkhal in hiche ni chu kichatsah hen.

⁶Chule hiche janchu muthimin mangjeng hen; hichu kumsunga nikho lah-a jong pandahen, lha kisim nalah ajong panghih hen.

⁷Veovin hiche janchu janlengvai hihen; hia chun kipa awgin hung lutdahen.

⁸Alunghem nao sodohgo-a nikho gaosaphon hichu gaosap muhen.

⁹Thingjangvah ahsi hochu thim taohen, hiche chun khovah velehen, ahin khatcha jong mudahen, khovahlhah jong mudahen.

¹⁰Ajehchu hiche jan chun kanu naobu anasingpon, chujongle gentheina kamitna konin ana selmangpoi.

¹¹Ipijeh-a naobu-a kona kanathi louham? Oisunga kona kahungdoh a chu ipijeh-a kahinna kanalha louham?

¹²Ipijeh-a pheiphung in einasana? ahiloule, ipi dinga kachepding noi ana uma ham?

¹³Chutile keima tu-a hi analuma thipbeh-a anaum tadinga, keima ana ihmu tadinga, hichepetna chu keima anacholdo hitaleng,

¹⁴Amaho-a dinga khogemsa kisema leiset thumopthem ho le leiset lenghoto,

¹⁵Ahiloule a-inhou dangka a sudima, sana neija leng chapatetoh,

¹⁶ahiloule aphatlouva peng chapang kisel mahthah khat tobangla kana hitapon, vah mukhalouhel naosen ho tojongla kanabang tapon,

¹⁷Hikoma chun migilouho alungkham naova konin atangun, chule athacholla chu akitha oltai.

¹⁸Hikoma chun songkul lut ho acholngaovin; mibol gentheina aw jong ajatapouve.

¹⁹Hikoma chun alen aneo aumun, chule sohjong apakaipa-a konin achamlhat tai.

²⁰Ipijeh-a genthei thohpahi vah chu anakipea, chule alha hesoh lengvaipahi hinna anakipeham;

²¹ Thina ngaicha lheh-a ahivanga hunglhung dehlou, chule gouthil kiselgu sanga nasajo-a holpa;

²²Amahon lhankhuh amutengule, hatah-a kipah thanomji hilou vuham?

²³Ipijeh-a alampi kisel mangpeh mipa hengle, Pathen'in kul akaikhum pehpa henga vah kipe aham?

²⁴Ajehchu ka anneh masangin kahai sammin eiphan, chule kapen ginhi twi bangin akibunglhai.

²⁵Ajehchu kakichat pentah thilchu kachunga alhungtan, chule kana ginjing thilchun eihin phatai.

²⁶Keima kana hoidohpon, choljong kana choldopoi, chule thipbeh injong kana umpoi, ajehchu gimna chun eilhun khumtai.