Read Thado Chin Job 30 Bible Online

Job 30 - Thado Chin bible

Job 30

¹Ahinla tun, apateu kaganhon ngah-a uichate toh pangkhom dinga jong kadeilou, keisanga khangdongjoho chun i-sah louvin eibolun ahi.

²Henge, akhut thahatnaova kona ken ipi kaphatchompi ding ham? athahatnao chu beija ahitai.

³Lhahsap jehle keljeh-in amaho achang lhatnun, masanga ana kamhel le agohkeo gamthipma chun ajamlutnun ahi.

⁴Amahon nangboh lah-a vandol, chule theimi jungchu anehdiuvin abotdoh un ahi.

⁵Amaho chu miho lah-a konin aki deldoh-un, (amahon gucha kihoh bangin hatah-in a-aovun;)

⁶Phaicham khikah dungle, leiset kotong sung, chule songpiho lah-a umdin adeldoh-un ahi.

⁷Hamboh lah-a amaho chu apengun, lingphung noi dunga amaho akisukhomun ahi.

⁸Amaho mingol chate le, milung lhomho chate ahiuvin, amaho leiset sangin aphamo jouve.

⁹Tun keima amaho la chu kahin, henge, keima aseichah-u kahitai.

¹⁰Amahon eihotaovin, keija konin gamlatah-a ajamun, chule kamai chil setkhum dingjong akiphalam pouve.

¹¹Ajehchu aman kakhao alhanenga chule eisuhgenthei jeh-in, amahon jong ka-angsunga kamdal alha nengun ahi.

¹²Kakhut jetlama khangdongho akichoisangun, kakeng asonmangun, chule amanthahna lampihou chu keima dounan aboldoh uve.

¹³Amahon kakeng lampi asuseuvin, kahamset nading kamasanga akoijun, amaho akithopi ding aumpoi;

¹⁴Amaho twipi pohjah bangin kachunga ahungun, setna lah-a kachunga ahung kitoluve.

¹⁵Tijatnaho kachunga ahung kihei lutnin, amahon kahinna chu huibangin ahin delun, kaphat theina chu meibol bangin achemang tai.

¹⁶Chule tun kahinna kachunga akisunglhan, suhgenthei nikho hon eikolchah tai.

¹⁷Jantengle kaguhon eichipjin, katha junghon choldona aneipoi.

¹⁸Kanatna hoisetna jehchun kavon akikhelsah-in, kasangkhol chol ngong bangin eikanbeh tai.

¹⁹Aman bonlhoh lah-a eileh lutnin, keima vutle leivui kabang jengtai.

²⁰Keiman nangma kakouvin, ahinla nangman neingai pehpoi: keima kading doh-in, chuleh nangman iman neigelpoi.

²¹Nangma keima dingin nahung giloutan: na bantha hattah chun nangman neidouve.

²²Nangin huijin neidom touvin; achunga chun neitou sah-in, kahinnaho nasujun lhatan ahi.

²³Ajehchu nangman thina-a neipuilut ding, chule ahing jouse dinga kitepsa ina chu neipuiding ahi, ti kahei.

²⁴Itin iti jongle amaho kisuhgepna-a kapjongleu, aman lhan geija akhut ajahdoh louding ahi.

²⁵Boina neiho dinga kanaka hilouham? kahinna hi amaho dinga analungna-a hilouham?

²⁶Apha kagaldot teng, kahenga setna ahungjin, khovah kanga tengle muthim ahung lhungjie.

²⁷Kalung agimlheh jin, akicholdopoi, genthei hesohna nikhon eikimai topi jinge.

²⁸Nisa beijin lunghemin kavahlen, mipi kikhomho lah-a chun kading doh-in kakapme.

²⁹Keima dragon ho sopile, sumbupi ho kiloipi kahi.

³⁰Katichunga kavun adupmin, kaguhohin eileusa henhune.

³¹Ka selangdah jong lunghemna, chule kamut gingjong akapho ogin asohtai.