Read Thado Chin Job 31 Bible Online

Job 31 - Thado Chin bible

Job 31

¹Keiman kamit tenitoh kitepna kasemin, achutile ibola nungah kageltah dingham?

²Ajehchu chunga Pathen'a kona chanding ipi umam? chungsang Hatchung nunga kona gou chan ding ipiham?

³Mi khanggilou dinga manthah na um hilou ham? engbolna kidangtah chu khansetna bolteho-a ding hilou ham?

⁴Aman kalampiho amulou hija, chule kakho lhahnaho asim hilouham?

⁵Keima pannabei ja kanavalea, ahiloule lheplhahnaho-a kakal kanason gangtah-a ahile,

⁶Pathen'in kadihna ahettheina dingin, khaikotnin eilep hen.

⁷Kakalson nahi lampia kona akiheimanga, kamitnin amuchu kalungin ajuile, anen khattou kakhutna abetahle;

⁸Chutengle muchi tungting adangin nehen; henge, kason kapahho chu ajungah kibotdoh hen.

⁹Numei khatnin kalung alheplhah-a, ahiloule ka-in heng kotphunga ka chanlhih-a ahile;

¹⁰Chuteng ka-inneipin midang ding chang suhen, chule midangho amanu chunga bohkhup uhen.

¹¹Ajehchu hichehi thet umtah khansetna ahin; henge, hichehi thutan hon engbolna apehding khansetna chu ahi.

¹²Ajehchu hichehi manthah na geija kavamtheija meichu ahin, chule kaphat touna jouse ajunga kibodoh ding ahi.

¹³Kasohpa ahiloule kasohnu thu chu i-sah louva kabola, amahon keima eikinahpi tengule;

¹⁴Pathen ahung kipatdoh tengle ikatiding hitam? Aman aviltengle ipi-a kadonbut dingham?

¹⁵Naobu sunga keima einasempa chun ama asem hilouham? chule khatseh-in naobu sunga einasemu hilouham?

¹⁶Keiman mivaichate ngaichat ka-itpeh-a, ahiloule meithainu mit chu kalosamsah khah-a ahile;

¹⁷Ahiloule ka-an chu kachanga kakineh-a, chule paneilou ten hichu anehkhah loule;

¹⁸(Ajehchu kakhangdon laijapat amachu keimatoh hung khanglen khom ahin, pa banga, kanu naobu sunga patna amanu kahin lamhil ahi);

¹⁹Koihamkhat ponsil lhahsam jeh-a mangthah-a, ahiloule silding neilou mivaicha khattou kamua;

²⁰Alungin keima phatthei eibohlouva, chule kakelngoi mulla aman lum asah loule,

²¹Kotpi phunga eikithopi kamua, paneiloute douna-a kakhut kalapma ahile,

²²Chuteng kabanhi kalengkouva konin lhonglha henlang, chule kaban guhi bonglha jeng hen.

²³Ajehchu Pathen'a kona manthah na chu keidinga tijat umtah ahin, chule alalna jeh-in, kathoh joupon ahi.

²⁴Keiman kakinepna chu sana kahi sah-a, ahiloule sana theng jah-a, nangma katahsana nahi, kanati-a ahile;

²⁵Kagou tamjeh le, kakhut hin tamtah amujeh-a kakipa-a ahile;

²⁶Keiman nisa ahungvah kavetna, ahiloule lhathah vahtah-a ache kavetna;

²⁷Chule kalungthimhi aguh-a jol lhah-a auma, ahilouleh kakamin kakhut achopleh;

²⁸Hiche jonghi thutanpan engbolna apehding khansetna chu ahi; ajehchu chunga um Pathen chu keiman kasanlou ahitai.

²⁹Keima eithetbolpa kisuhmang nikho-a kakipa-a, thilsen alhunkhum teng kakichoi sanga ahile;

³⁰Kakamhi chonsetna, ama hinna sapset sahna dingin jong kaphalpon ahi.

³¹Kahoubuh mihon, Oh atahsa chu kaneilouva ahile! kalungnao chimlou ding ahi, atiuve.

³²Gampam mi khopi lamlena agehpon, ahin kholjinleho dingin kakotho kahonpeh-in ahi.

³³Keiman Adam banga kasuhkhelna leh, kakhan gitlouna chu ka-angsunga kakhu khuma ahile;

³⁴Keiman mihonpi kakichatna, ahiloule insung mite i-sah louna chun eikichatsah-a, thipbeh-a kauma, kotpama potlouva kaum-em?

³⁵O khattouvin eingaipeh hitaveleh! vetan, kangaichat chu, Hatchung nungin eidonbutna, chule kaki doupin lekha ajihding chu ahi.

³⁶Thonlouva hichu kalengkouva kaputna, chuleh lallukhuh banga kakhuh ding ahi.

³⁷Kakholhah jatchu ahenga kaphon doh-a, vaipo khat banga ahenga kahin nailut ding ahi.

³⁸Kagam chu keima douna-a apenna, ahiloule langkonho jong chu hitobanga chu akiphina ahileh;

³⁹Keiman hiche lougaho chu sum pelouva kaneh-a, ahiloule aneiho hinkho chu kachansah-a ahileh;

⁴⁰suhlouchang khelin meithai seltholing, sakol chang khellin hampa kehhen. Job thusei akichaitai.