Read Thado Chin Job 33 Bible Online

Job 33 - Thado Chin bible

Job 33

¹Hijeh chun Job, nahenga katao ahi, kathuseiho ngaijin, chule kathu jousehi neingaipeh-in.

²Vetan, tun keima kakamkan, kalei hin kakama thu aseije.

³ Kathuhohi kalungsung chondih na-a kon hiding ahin, chule kakamin hetna chu thengtah-a aphondoh ding ahi.

⁴Pathen lhagaovin einasemin, chule Hatchung nungpen haina hu chun hinna eipeh ahi.

⁵Nangman neidonbut thei dinga ahile, nathuho chu kamasanga koitoh inlang, dingdoh-in.

⁶Vetan, keimahi nadeisah dungjuija Pathen khela um kahin, keijong leinganna kisemdoh kahi.

⁷Vetan, tijat kaumna-in nakichat sah pontin, kakhut jengjong nachunga gihponte.

⁸Tahbeh-in, kajah theijin thu naseijin, chule keiman nathusei awgin chu kajatai;

⁹Keima suhkhelna beija thenga kahin, themona neilou kahin, khansetna jengjong keija aumpoi.

¹⁰Vetan, aman keima douna ajehho chu amun, aman keima amelma khatnin eisimtai,

¹¹aman kakengteni ahennin, kalampi jouse amelchih-e.

¹²Vetan, hichea hin nangma nadihpon ahi; keiman nangma donbut-inge, Pathen chu mihem sanga lenjo ahi.

¹³Ipidinga ama douna-a nakiphin ham? ajehchu aman ama chungchang thuho khatcha apepon ahi.

¹⁴Ajehchu Pathen'in khatvei thu aseijin, henge nivei, ahijeng vangin mihemin ahetheipon ahi.

¹⁵Jan manga, janna muneina-a, mihemte chunga imut lhuhna ahung chuh-a, lupna chunga imutsona alhun tengle;

¹⁶Chuteng aman mihem nakhang ahonpeh-in, chule amaho kithupehna chu asinkhumpeh-in,

¹⁷Athil gona kona mihem alahdoh theina dingle, mihem'a konin kiletsahna aselmangpeh jin ahi.

¹⁸Kokhuh-a konin ahinna, chule ahinkho chu chemjam'a amanthah nadinga konin ahuhdoh peh-in ahi.

¹⁹Aman ajalkhun chunga natna, chule agu achangho jouse hachang natna natna-in asugimin,

²⁰Hitia chu ahinkho chun changlhah, chule ahinna chun anneh ahot nadinga abol ahi.

²¹Akimutheilou nadingin, atipum chu ajunmang tan, chule agu anakimulouho chu adoh setsot tai.

²²Ahi, ahinna chun lhankhuh lam, chule ahinkho chun suhmangna chu anaijin ahi.

²³Achondihna chu mihem musahna dinga, thupole khat, paoledoh khat, sangkhat lah-a khat amatoh auma hileh,

²⁴Chuteng amachu ama lungset them ahin, hitin aseije, kokhuh-a lhahlutna dinga konin aman ahuhdoh-in, keiman lhatdohna kamutai.

²⁵Ama tipum chu chapanga sanga noujo ding, ama akhangdonlai nikho-a kilekit ding ahi.

²⁶Ama Pathen henga taoding, chule ama chu amadinga lunglhaina hiding, chule aman kipah-a amai amuding ahi: ajeh chu aman chonphatna chu mihem apehding ahi.

²⁷Aman mihemho aven, khattouvin, keima kachonsetan, adih-a konin kakiheimang tan, chule hiche hin eiphatchom sahpoi, atia ahileh;

²⁸Aman ahinna chu kokhuh-a alhahlutna dinga kona alhatdoh ding, chule hinkho chun vah amuding ahi.

²⁹Ven, hiche thil ho jousehi mihem dingin Pathen'in abol jingin,

³⁰Kokhuh-a kona ahinna puidoh nading, hinna vah-a vahsah nading ahi.

³¹Vo Job, phatah in melchih in, kathu ngaijin, thipmin, thu kaseiding ahi.

³²Nangin seiding khattou naneija ahile neidonbut in, seijin ajehchu keiman nangma kathem chansah nome.

³³Ahiloule kasei ngaijin, thipmin, chule keiman chihna kahil ding nahi.