Read Thado Chin Job 34 Bible Online

Job 34 - Thado Chin bible

Job 34

¹Elihun adonbut kitleuvin aseije:

²Vo miching nanghon; kathuhi ngaijunlang, hetnanei nanghon nanakhangu hinsung uvin,

³ Ajehchu kamin an atepbangin, nakhangin thu apatepmin ahi.

⁴Eihon thutanlhah dih kilhenu hitin, ilah uva apha chu ipiham kihetnu hite.

⁵Ajehchu Job'in keima michonpha kahin, Pathen'in kadihna alahmang ahitai, ati.

⁶Keima kadihna chunga kajou ding ham? suhkhel bei kahivangin kamaput hi damtheihoi ahipoi.

⁷Job banga mi-isahlouna twibanga dontheijah koi umam?

⁸Ama khangitlouna bolhotoh akiloijin, chule miphalou hotoh akilhonlen ahi.

⁹Ajehchu aman, mihem Pathen'a kipah-a aumhin imachan aphatchom pipoi, ati.

¹⁰Hijeh chun hethem na nei mi nanghon kathuhi ngaijun; Pathen'in khansetna abol louding, chule Hatchung nungin khangitlouna abol louhel ding ahi.

¹¹ Ajehchu mihem chu atoh dungjuija achunga alhunsah ding, chule mijouse achonna dungjui cheh a lethuhna amusah ding ahi.

¹²Henge, Pathen'in khan gitlouna abol louhel ding, Hatchung nungin jong thu akaleh-a atan louding ahi.

¹³Leiset chunga thunei dinga kon mopohna apeh ham? ahiloule vannoi pumpi kon achunga akoiham?

¹⁴Aman mihem chunga alung koihen lang, alhagao le ahaina hu chu kilah taleh;

¹⁵Tipumpi mangthah khomuva, chule mihem leivuija kilekit ding ahi.

¹⁶Tun nangma hetkhen themna nei nahile, hichehi ngaijin: kathusei hohi ngaiphan.

¹⁷Thudih hotbolpa chun vai ahomding hija? chule kitah chungnung pen chu nangin themmo nachan dingham?

¹⁸Lengpa jah-a, nangma khangse nahin, chule pipuiho jah-a, Pathen helou nahiuve, tiding kilomnam?

¹⁹Ahin ama pipuiho langa alangnei chompon, chule mivaichaho sangin mihaoho ajachom dehpoi; ajehchu abonchauva akhutsem ahiuve.

²⁰Amaho mitphetkah louvin thiuvintin, chule mipi ho chu jan khangkim le suhboija umdiu, chemang diu, chule mihat hochu mihem khutjao louva kaimanga umdiu ahi.

²¹Ajehchu aman mihem lamlhah avejingin, achenachan amusoh keijin ahi.

²²Khangitlou bolho kiselna dingin, muthimle thina le-lim aumpon ahi.

²³Ajehchu Pathen angsunga thutana-a lutna dinga, aman adih kalval mihem chunga akoilou ding ahi.

²⁴Aman simthei louva mihat ho chu asuhbonga, akheluva midangho atunding ahi.

²⁵Hijeh chun aman atohhou chu ahen, amaho chu suhmanga aumtheina dinguvin, jankhat sungin alehkhup heltan ahi.

²⁶Aman amaho chu migilouho bangin midangho mitmu tah-in ajepmin;

²⁷Ajehchu amaho ama-a konin akinung heijun, chule alampi khat jengjong agelphata pouve;

²⁸Chutichun ahenga amahon mivaichaho kana chu alhunsah-un, aman bolgentheiho kana chu angaipeh tan ahi.

²⁹Aman asuhcham tengleh koiham boina boldinga? nampi douna hihen lang mikhat douna-a kibol hijongle, aman asel tengle koiham amai muthei dingah?

³⁰Chutiachu mipha lhemin vai ahomlou ding, achutiloule mipi ho thanga ohding ahi.

³¹Tahbeh-a mihemin Pathen koma, suhgimna chu kathohtan, doumah bolkit taponge,

³²Kamu khahlou chu nangman neihilin, keiman khan gitlouna kaboljongle, bolkit taponge, tia aseiding chu kilom ahi.

³³Keima hilouvin nangma gel bang ahidem? nangma danlang nomjongle chun, aman nalethuh ding ahi; hijeh chun nahetchu seijin.

³⁴Hetthemna neihon eihilen, chule michingin kathusei ngaihen.

³⁵Job'in hetna jaolouvin thu aseijin, athuseiho jong chihna jaolou ahi.

³⁶Khang gilouho dinga adonbut jeh-in, Job chu akhona geija achungthu tanding hi kalung ahi.

³⁷Ajehchu aman achonsetna chunga akiphin ben, aman ilah uvah akhut abengin, chule Pathen douna athu apun sah-in ahi.