Read Thado Chin Job 35 Bible Online

Job 35 - Thado Chin bible

Job 35

¹Hiche kalvalin Elihun aseiben, chule hitin aseije:

²Kachon phatna hi Pathen'a sangin asangjoi, tia nasei chu dih dinga nagellem?

³Ajehchu nangman, kachonsetna kona theng kahile, nang dinga phachom ipi hiding hija, keiman aphachom ipi kamuding ham? tin naseije.

⁴Keiman nangmale naumpi naloiho chu donbut-inge.

⁵Van lama dah inlang vetemin; chule nangsanga sangjo meibol ho khu vetemin.

⁶ Nachonsetle, ama douna-a ipi nabol em? ahiloule nasuhkhelna apunbeleh, nangman ama henga ipi nabol ham?

⁷Nachon phatna ahile ama ipi napeh-em? ahiloule nakhutna kona ipi amu-em?

⁸Naphatlouna chun nangtobang mihem khat asuna theijin, nachon phatna chun mihem chapa chu aphatchom sah thei ahi.

⁹Suhgentheinaho atamjeh-in, akisugen theiho aka sah-un, mihat ho ban thahat jeh-in, apeng doh-un ahi.

¹⁰Ahinla koimachan jong eisempa Pathen, janteng la eipepa chu hoija umam? atipouve.

¹¹Leija gamsaho sanga eiha hiluva, chungleng vachate sanga chingjoa eisempao chu, hoija umem? atipouve.

¹²Chua chun apengun, ahinla miphalouho kiletsah jeh-in, koimachan adonbut pouve.

¹³Tahbeh-in Pathen'in pannabei chu ngai pontin, Hatchung nungin jong nahsah-a aneilouding ahi.

¹⁴Nangin amachu muponge tijongle chun, amasanga chu thutana umnalai ahin; hijeh chun ama chu tahsan nin.

¹⁵Ahinla tun hitichu ahilou jeh-in, lunghan na-in agavilin, hijongle nasabehsetnin ahehhih laijin,

¹⁶Hijeh-a chu Job hi pannabei ja kamka-a, hetna jaolouva athusei apunsah ahi.