Read Thado Chin Job 36 Bible Online

Job 36 - Thado Chin bible

Job 36

¹Elihun aseijompeh-in, hitin aseije.

²Neikhongai nalaijun, chule Pathen khella seiding kanei nahlai chu, vetsah-unge.

³Gamla tah-a konin kahetna galangting, eisempa chonphatna phongdoh inge.

⁴Ajehchu kathuhi nolnabei jou hilouhel ding ahin, hetna chamkimpa chu nangma toh uma ahi.

⁵Vetan, Pathen chu thaneitah ahin, koimacha nahsahmon akoipoi; Ama thahatna le chihna-a thaneitah ahi.

⁶Aman migilou hinkho ahoidoh pehpon, mi genthei chu dihna apen ahi.

⁷Michonpha ho-a konin amit aheimangpon, ahinla amaho lengho toh laltouna chunga atouvun; aman amaho chu a-itih-in atungdohjin, chule choisangin aumjiuvin ahi.

⁸Chule amaho bulkituh ahiuva, bolgentheina khaova kihen ahiule;

⁹Chuteng aman athilbolule, asuhkhel nao chonvalna chu amusahjin ahi.

¹⁰Aman abilkolu chu sehgimna angaina diuvin ahonpeh-in, khansetna kona ahungkile theina diuvin thu apejin ahi.

¹¹Amahon thu angaijuva, ama ajenule, anikhohou phattheina, chule akumhou nopsahna-a amandiu ahi.

¹²Ahinlah thu angailou vangule, chemjam'a mangthah uva, chule hetna beija thidiu ahi.

¹³Ahinla miphalhem hon lunghanna lungthima akikhol khomun, aman amaho ahen tengle atao jipouve.

¹⁴Amaho akhandon laijun athiuvin, ahinkhou chu mithenglouho lah-a aumjin ahi.

¹⁵Migenthei chu bolgentheija aumna-a konin ahuhdoh-in, suhgentheina-a anakhangu ahonpeh-e.

¹⁶Hitima chun aman hahsatna-a konin napuidoh intin, suhboina umlouna mun lentah-a nachon lutding, chule nadokhanga kiluiding chu nehtuitah dimset ding ahi.

¹⁷Ahinla nangin migiloute thutanna chu nagui lhunsahtan, thutannale thudih chun namandet tai.

¹⁸Lunghanna aumjeh-in chingtheijin, achutiloule ajepna-a chun nalhoh mang intin; chuteng lhatna loupitah chun nahuhdoh joulou ding ahi.

¹⁹Aman nahaona jabol intem? ajabol louding, sana ahiloule thaneina jouse jong angaisang louding ahi.

²⁰Miho aumnao mun'a akisuhmangu janchu ngaicha hih-in.

²¹Chingtheijin, khangitlouna ngaito hih-in, ajehchu gimbolna sangin hichehi nalheng jotai.

²²Vetan, Pathen'in athaneina-in achoisangtan, amabanga kon ahil theijem?

²³Alampi chu koijin aseipeh-am? ahiloule, nangin khangitlouna nabole, tia kon asei theijem?

²⁴Mihon avetjingu, anatoh choisang dingchu geldoh jingin.

²⁵Mitinin hichu muthei jintin; mihemin gamlatah-a konin muthei jinte.

²⁶Veuvin, Pathen chu aloupin, eihon ama ihepouve, akum jatho jong holdoh jouhoi ahipoi.

²⁷Ajehchu aman twi vatneocha cha anasemin, twimeija konin go ajulhajin ahi.

²⁸Hichu meibolin gomal asema, chule mihem chunga nengtah-a julhaji ahi.

²⁹Meibol kithejal leho, ahiloule ahoubuh gingho khu mihemin ahetkhen thei jem?

³⁰Veovin, aman achunga chun avah ajalin, twipi todop chu akhu-in ahi.

³¹Ajehchu aman hitiho-a konhin mipi thu atanin, an neh nengtah-in apen ahi.

³²Aman vah chu meibolin atomin, akikah-a hungdoh meibola kona avahlou nadin thu apen ahi.

³³Chua hu gin chun aumdan chu avetsah-in, twimei umchan jong ganchaho ahetsah-e.