Read Thado Chin Job 37 Bible Online

Job 37 - Thado Chin bible

Job 37

¹Hichea jonghin kalung chang akihotnin, chule achomdoh dehdeh jenge.

²A-awgin le akama kona hungpot chu lunglut tah-in ngaijin.

³Aman hichu van pumpi noi-a asolin, akolphe chu leiset kolmong geija dingin aphet sah-in ahi.

⁴Hiche jouhin aw khat ahung kitumin, aloupina aw-a chun ahung ging dumdumin, chule a-aw akijahteng jongle amaho chu atuhtang louding ahi.

⁵Pathen chu kidang tah-in a-aw'in ahung kithongin; eiho hetjouhoi hilou thil loupitah abole.

⁶Ajehchu aman buhbang henga, leija umin atin; chubangma chun athahatna gophinle gohong henga jong aseijin ahi.

⁷Mijousen athilbol ahettheina diuvin, aman mitin khutchu amelchih-in ahi.

⁸Chuphatnin gamsaho akul sunguva alutnun, amuncheh-a aumtaove.

⁹Lhanglama konin huise ahungnungin, sahlama konin dap ahunge.

¹⁰Pathen hu-a konin buhbang aumin, chule twilentah jong akang jin ahi.

¹¹Meibol satah jengjong chu twihu achun asunouvin, ameibol bangleh chu athejalin ahi.

¹²Aman athupeh jouseu vannoi leiset chung jouse-a abolna dingun, athumopma chun akipeikol lele-un ahi

¹³Aman suhdih nading ham, agam ding ham, ahiloule hepina ding hama hichu asosah ahi.

¹⁴Vo Job, hichehi ngaijin; dingdet jinginlang, Pathen natoh kidangho chu ngaiton.

¹⁵Pathen'in itih-a amaho agoltoh-a, ameilom vah chu avahsah, nangin nahet em?

¹⁶Meilhang ho gihdan, hetna chamkimpa thilbol kidangtah chu nahet em?

¹⁷Lhanglam huija leiset athipsah teng, navon iti lummaham, nahet em?

¹⁸Phatvet kilhajol bangtah-a nasa-a vanlaijol hi, nangin amatoh naphajal ham?

¹⁹Muthim jeh-a kaseidiu kaseidoh theilou jeh-un, Ama henga kaseidiu neihilun.

²⁰Kathusei dingchu hilding kangaijem? mikhatnin thu seile, thonlouva ama vallhuma umding ahi.

²¹Tun mihem hon meilhang ho lah-a vah vahtah chu amupouvin, ahinla huijin amuttheng jitan ahi.

²²Sahlama konin van ahung thengselin, Pathen chu janale tijatnan adime.

²³Hat chungnung thudol chu imudoh joupouve, ama thilboltheina, thutanlhahna, dihna-a chungnung pen ahin, aman sugenthei ponte.

²⁴Hijeh-a chu mihon aginu ahin, milungching khatcha aman ajabol aumpoi.