Read Thado Chin Job 38 Bible Online

Job 38 - Thado Chin bible

Job 38

¹Chuin chimpei lah-a kon chun Pakaiyin Job ahindonbut nin, aseije.

²Hetna bei thuho-a thumop thimsahpa chu koiham?

³Pasal tah bangin nakong kigah-in; nangma thu kadoh ding nahin, neidonbut ding ahi.

⁴Leiset bul kaphupetna chu hoilai ja nana umem? hetkhen themna naneile phongdoh-in.

⁵Alet aneo koijin atotoh ham, nahet nam? ahiloule achunga khau chu kon ajandoh ham?

⁶Abul chu ipi chunga kihendet naham? ahiloule aning song chu kon agaphu ham?

⁷Itih tengle jing valpa hon La asah khomuva, Pathen chapate jouse kipah tah-a ao dingu ham?

⁸ Ahiloule naobu-a kon potdoh ding banga, alonjal dingteng twipi kotpiho kon akha ham?

⁹Aponsil dingin meilhang kasema, chule akitomna dingin muthim satah kasema,

¹⁰Hiche dinga chu akhonna kasema, kotgol hole kotpiho kasema,

¹¹chule hichangei nahunga, nakhokhel louding; chule hilaija hi nahoithona twikinong chu kingading ahi kati louham?

¹²Nakhohetna patna jingkah hi thupeh napeh khah-a, chule jingphalvah hi amun kihetnin kitikha em?

¹³Hitia chu leiset kolmong gei atuh theija, chua kona mikhangseho thinlhah ahi nadiu nabol khah-am?

¹⁴Namdet namna henga bonngan bangin heidoh in aumun; chule ponsil bangin adinguvin ahi.

¹⁵Migilou ho-a konin avah uchu lahpeh-in aumin, chule banjang nasatah chu kihehbong ding ahi.

¹⁶Twikhanglen nahho-a nalutkhah tah-em? ahiloule athuhdan kholla nachekhah tah-em?

¹⁷Nang dinga thina kotpiho kihongtam? ahiloule thina lim kotkhah ho namukhah tah-em?

¹⁸Leiset letdan hi nahet em? nahetsoh keile phongdoh temin.

¹⁹Vah umna lampi chu hoilai ham? chule muthim aumna mun hoilai hija,

²⁰Agamgi geija chu cheding hitale chun, hiche a-in lampi chu naga hekhen nadem?

²¹Chuche phat laija nanapen tahjeh-a chu nahet nam? ahiloule nanikho ho jong atamtah jeh-a nahet nam?

²²Buhbangho kikhol na-a nalut khah tah-em? ahiloule gel kikholna namu khah-a;

²³Genthei nikho, kidoule kisat nikho-a dinga kakheh hokhu namu khah-am?

²⁴Ipi lampia vah chu kikhenna, nisolam huihi leichunga kithecheh ham?

²⁵Twi lonlet nading twilam kon ahop khenna, ahiloule van ginle kehlhah nading lampi;

²⁶Mi umlouna leichung, mihem umlouna gamthipma gojuh nadinga;

²⁷Akham helsa gam donlouva umchu kidodoh sah kitdingle, hamdong hindoh sah kitdinga alampi chu kon asem ham?

²⁸Gotuijin pa aneijem? daitwi hohi koi hin ham?

²⁹Buhbanghi koi naobu-a hung pengdoh ham? chule van dai bang jonghi koi hin ham?

³⁰Twiho chu song bangin atah-in, chule twithuh chungchu akanin ahi.

³¹ Nangman bombel khu nakan khom theija, ahiloule Juheisuhtun khu nalhap lhah theijem?

³²Ahsi somleng khu aphatna napuidoh theija, ahilou le sahlam Ahsilen le achate nalam kaithei jem?

³³Nangman van chondanho nahet em? hicheho kivaipohna chu leisetna nachesah theijem?

³⁴Twi tamtah in nachup theina dinga, meilomho chu na awsoa nakou theiding ham?

³⁵Kolpheho chu achena dinguva nasol theija, chule nahenga, hilaija kaumuve ahinte thei dingu ham?

³⁶Sung gil lama chihna chu koijin akoi ham? ahiloule lungsung hetkhen themna chu koijin apeh ham?

³⁷Chihna-a meibol hokhu asimtheija koiham? ahiloule van twibom khu kon alheilhah thei dingham?

³⁸Itih-a leivui chu hungtah-a, chule alomho chu hung kimatchetna ham?

³⁹Keipi bahkai chu asaneh ding naholpeh theija, keipi bahkai nou gilkel chu navahva thei dingham?

⁴⁰Itihteng akosunguva koljiuva, achangpan naova itihleh changpang jiuham?

⁴¹Va-ah noute khu Pathen henga apen penna, nehding lhasama alenlele tenguleh, kon neh apehji-ham?.