Read Thado Chin Job 39 Bible Online

Job 39 - Thado Chin bible

Job 39

¹Nangin songpi lah-a gam kelchaho itih-a asoding phat nahetnam? ahiloule sajuh-in nou itih-a aneiding namelchih theijem?

²Nangin, avoplai lhaho nasim theijem? ahiloule itih phatna asodiu nahet em?

³Amaho aboh-un, anouvu asoh-in, agentheinau akoidoh jiuvin ahi.

⁴Anousenhou chu ahung maldoh-un, hamlah-a ahung khang doh-un, achedoh-un, ahungkile kitji tapouve.

⁵Gam sanganho chu kon alhadoh ham? ahiloule akihennao khao chu kon asutlhah ham?

⁶Gamthip chu a-inding, chule gamtem gamchu achenna munin kasemin ahi.

⁷Aman khopi-a mihonpi chu ima asahpon, ahoijipa husa jongchu ajajitapoi.

⁸Moljol ho chu ama lhatlena ahin, chule aman hamhingho jouse chu ahollen ahi.

⁹Sakol kinei chun nangma najennom ding hinam? ahiloule nagankula umnom ding hinam?

¹⁰Sakol kinei chu angonga khao nakhithei dingham? ahiloule loukaina nabuto-a, phaicham chu akaibot thei dingham?

¹¹Athahat nasat jeh-a chu nangman ama chu natahsan dingham? ahiloule natohding chu ama nanot khum ding ham?

¹²Namuchi hochu na-in'a ahinpoh lutna, nachangsala kholkhom dinga natahsan ding ham?

¹³Vahong hochu lhaving hoitah napeh hilou ham? ahiloule vachalen chu lhaving le amulho napeh hilou ham?

¹⁴Aman leija atuiho adalhan, leivuijin alumsah-in,

¹⁵chule mikhat touvin akenga alhokhah theiding, ahiloule gamsa khat touvin asukeh theiding ahi jong ageldoh jipoi.

¹⁶Ama nou hilou bangtah-in anousenho chunga a-engsen, atohgimna chu kichatna beija mohseh ahi;

¹⁷Ajehchu Pathen'in amanu akonin chihna chu aladoh-in, ahetkhen themna jengjong amanu apepon ahi.

¹⁸Amanu ama le ama sangtah-a akidopsang phatle, sakol le achunga toupa chu ataitomjin ahi.

¹⁹Nangman sakol khu thahatna napeh em? angonga along gingjeng jung navopeh ham?

²⁰Nangman khaokhopi ho banga nakichat sah theijem? anahko loupitah chu tijat umtah ahi.

²¹Aman tolgo atinin akhotjin, athahatna-a athanomin; gal manchah choiho to kimuto dingin apotdohjin ahi.

²²Kichat chu anuisatnin, akicha pon, chemjam'a konin jong anungchon ngaipon ahi.

²³Livathei ama dounan aginglah lah-in, tengcha le lumho aval lahlah-in ahi.

²⁴Aman leiset chu tijat-umtah le lunghang tah-in aval lhumin; hiche hi sumkon gin ahi tijong aman atahsanpoi.

²⁵Aman sumkon ginho lah-a chun, haha, atin; chule gamlatah-a konin gal husa ajan, gal lamkaiho husan leh akithong gin ajan ahi.

²⁶Nangma chihna jeh-a muthi chu lengji-a, alhaving teni chu lhanglam nga-a ajahji ham?

²⁷Muvanlai chu nangma thupeh-a lengtouva, chule chungsanga abuh aset ham?

²⁸Ama kol lah-a achengin, songkol chunga mundet tah-a chun acheng jin ahi.

²⁹Hia konchun thading sa aholin, chule amitnin gamlatah amun ahi.

³⁰ Anousen houvin thisan achopmun, chule sa kithat umna mun'a chun, amanu aumjin ahi.