Read Thado Chin Job 4 Bible Online

Job 4 - Thado Chin bible

Job 4

¹Chuphatnin Teman mi Eliphaz chun adonbutnin, hitin ati,

²keihon nangma kihoulimpi talengu nalung phamo dem? ahinla koiham paolouva umthei dinga?

³Vetan, nangman mi tamtah nahildoh-in, khut thalhom te chu nahatsah-in ahi.

⁴Nathun alhusapa chu atungdingin, khup ngoite chu nathahat sahtai.

⁵Ahin tun nachunga alhungtan ahile, nangma nalhasam tan; hichun nangma natongkhan ahile nangma nagenthei tai.

⁶Hichehi nakichat, natahsan, nakinepna chule nalampi ho-a nadihna chu hilouham?

⁷Geldoh-in, katao ahi; suhkhel neilou mangthah-a koi umam? ahiloule mikitah ho koi kipaidoh kha-am?

⁸Keimatah jengin jong kamudanin, khan gitlouna lou kaija kaiho chule khansetna muchi tu-a tuhon jong kibang bangin a-atnun ahi.

⁹Pathen hu-a amaho amangthah jiuvin; chule alunghana hu-a chun amaho ajunmang jitaove.

¹⁰Keipi bahkai kitum, chule keipi bahkai hang awgin, chule keipi donglai haho jong chu akisubong tan ahi.

¹¹Keipi bahkai teh chu nehding lhasamin amangthah jin, chuteng keipi bahkai nouho chu akithecheh jin ahi.

¹²Tun thilkhat guhthim chan kakom ahung lhungin; chule kanakhangin thuguh kisei ajan ahi.

¹³ Mihemte chunga imutlhuhna achuh-a, jana gao thilmu ho-a kona kagel laijin,

¹⁴Kichatna kachunga ahungchun, kakithingtai; hichun kagu jouse ahot longin ahi.

¹⁵Chujouvin lhagao khat kamaikoh-a ahungin; katimul athoujenge.

¹⁶Kading jingin, ahin keiman alimso kahe thempon; alim chu kamasanga aumin, athipchetnin, chuin keiman awkhat kajan hitin aseije,

¹⁷Thithei mihem Pathen sanga dihjo thei ham? mihem chu asempa sanga thengjo theiham?

¹⁸Ven, aman asohte chunga ginchatna aneipon; chule avantil te jengjong themmo achane.

¹⁹Ngetnin asuhmangji, bon in'a chenga, leivui lah-a kona kisemdoh leingan hohi, ichanna lhasamdiu ham?

²⁰Amaho chu jingkah-a patnin nilhah geijin suhmangin aumun, amaho chu i-sah loutah in atonsotnin amangthah jiuve.

²¹Amaho-a thilphapen chu chemangjilou ham? chuteng amaho chu chihna beijin athiji taove.