Read Thado Chin Job 40 Bible Online

Job 40 - Thado Chin bible

Job 40

¹Chukalvalin Pakaiyin Job adonbutnin, aseije:

²Hatchung nungpen kinahpi pachun ama ahilding ham? Pathen themmo chansah pachun hichu donbut hen.

³Chule Job'in Pakai chu adonbutnin, aseije:

⁴vetan, keima miphalou kahin, ipi kadonbut dingham? keiman kakhutnin kakam kisip tange.

⁵Khatvei kana seitan, ahinla donbut ponge, henge, nivei; hijongle seibe taponge.

⁶Chujouvin Pakaiyin chimpeija konin Job ahindonbut nin, aseije.

⁷Pasal tah bangin nakong kigah-in; nangma thu kadoh ding nahin, neidonbut ding ahi.

⁸Kathutan jonghi ima hilou neisopeh got ham? chonphat nachan theina dinga keima themmo neichan got ham?

⁹Nangin Pathen banga ban naneijem? ahiloule ama awgin banga nangma aw naginsah theijem?

¹⁰Tun nangma lalnale chungnun na-in kijem inlang, hoina le loipina-in nangma kijemin.

¹¹Nalung hanna chungnung chu bunglhan lang, mikiletsah tapou chu venlang, sunemin.

¹²Mi kiletsah tapou chu venlang, loilha-in, chule migilou hochu aumnaova lholhan.

¹³Leivui lah-a amaho selkhomin; chule guhthimin amaiju kanpeh-in.

¹⁴Chutengle keiman jong nahenga nakhut jetlamin nahuhdoh jouding ahi tia kaphondoh ding ahi.

¹⁵Tun vetan, Behemoth [1] khu nangma toh kasemkhom ahin, aman bongchal bangin hamhing anen ahi.

¹⁶Tun ven, athahat nachu akonga um ahin, chule ahatna chu a-oipoh laimu-a um ahi.

¹⁷Amei chu Cedar thing bangin achaloh sah-in; akhelbuh-a aphelom hochu akitomchah kheh-in ahi.

¹⁸Agu chu sum-eng hal tahbet tobang ahin, aguho chu thihlhon tobang ahi.

¹⁹Ama Pathen lampiho lah-a alupen ahin, asempa chun ama nailut nading chemjam asem thei ahi.

²⁰Tahbeh-in gamsaho jouse kichepna molhochun, a-an nehding ahin sodohpeh-in ahi.

²¹Ama thingphung limnoi, pumpengle hamling neiho noija akoljin ahi.

²²Thinglimho chun ale-limuva ama akhu-vin, vachadunga huisum hochun ama aum kimvelun ahi.

²³Veovin, aman vadung chu achipkangin, akinopoi; aman Jordan chu akama achipkang joudingin atahsanin ahi.

²⁴Amit tenin alaji-in, anahkuijin thangho chu aphujalpai jin ahi.