Read Thado Chin Job 41 Bible Online

Job 41 - Thado Chin bible

Job 41

¹ Ngakoija Leviathan [2] nakoidoh theiji em? ahiloule nakhao khaisuh-a chu alei nakhithei dingham?

²Nangin anah kohom sunga ngakoi nakoithei dem? ahiloule linga akha nasunpai thei dem?

³Nahenga ngehna tampi anei ding ham? nahenga aw nemma thu aseiding ham?

⁴Aman nangma toh kitepna asem dingham? a-imatih chana soh dinga nakipui thei dingham?

⁵Nangman ama chu vacha banga nakicheppi dingham? ahiloule nasoh numei ho dinga nahending ham?

⁶Agolhon golnop abolpeh dem? sumkolvei ho lah-a chu chan aneisahdiu hinam?

⁷Nangin avunchu thih hema nadimsah theija, ahiloule aluchu nga tenga nadimsah thei ding ham?

⁸Achunga nakhut ngaminlang, galchu geldoh inlang, bolkit tahih in.

⁹Veovin, ama thajo dinga kinepna chu moh ahin; ama akimu sehseh jongleh mihem chu pailhah-a umji-a hilouham?

¹⁰Ama tildoh dinga kingapcha mihang koima aumpoi, achutile koiham Ka-anga dingjou dinga?

¹¹Ama kalepeh kitna dinga koiham eikhamah? Vannoi pumpia thil umjouse hi keija ahi.

¹²Keiman atibahho hihen, athahatna hihen, amellom naho hijongle selgu ponge.

¹³Koiham aponsil chungnung hohlhah thei dinga? ahiloule kamdal ni puma akoma hung ngamding koiham?

¹⁴Ahaho chu tijat umtah-a kigol ahin, amaichang kotkhah hong ngamdinga koiham?

¹⁵Alipho chu akiletsahna ahin, sinkhana kinamkhum banga kikha khuma ahibouve.

¹⁶Akah uva hu alutthei louna dingin, khat le khat hanaijin akinaijin ahi.

¹⁷Amaho suhkhen ahilouna diuvin, khatle khat kijom matnin, akilompelun ahi.

¹⁸Achit tengle vah ahung kikapdoh jin, amit ho chu jingkah ninel toh abange.

¹⁹Akama konin thaomei kong, chule meisi pahlahlah ahungdoh jin ahi.

²⁰Belle khangbela kona twi asou bangin, anah homa konin meikhu ahungdoh jin ahi

²¹Ahaina huchun meihol hochu ajap-am min, chule akama konin meikong apotdoh jin ahi.

²²Angonga hatna aumin, amasanga lungkham nachu kipanan akilejin ahi.

²³Aphe hal hochu akijop matcheh-in, amaho chu adet chetnun, suhlonghoi ahipoi.

²⁴Alung chu song banga tah ahin, song sumhei noinung banga tah ahi.

²⁵Ama ahung kipatdoh tengle mihat hojong akichauvin, kichatna anatsat jehchun, ama hotah jong akisutheng jiuvin ahi.

²⁶Min chemjamin sat jongle ajolou ding, tengcha, tuljum, tenghem injong anang joupoi.

²⁷Aman thih chu changpol bangin agelin, chule sum-eng jong thingmot bangin agel bepmin ahi.

²⁸Thalpin ama ajamsah ngaipon, ahsongse jong ama dingin changkung tobang bep ahi.

²⁹Tenghem hochu poljang abahsah bepmin, tengcha akilo khumteng aman anuisat jin ahi.

³⁰Songhem hochu anoija aumin, aman bonlhoh chunga chun tenghem hochu athecheh jin ahi.

³¹Aman twi thuhtah chu bela twibangin asou sah-in, aman twikhanglen jong chu lou theikhat tobang asosah-e.

³²Aman anunga lampi chu avahsah-in, min twithuh chu samkang bangin ageljiuvin ahi.

³³Leichunga akibahpi ama tobang aumpoi, amahi kichat na beija kisema ahi.

³⁴Aman thil sang kiti jouse amun, ama akiletsah chateho chunga leng ahi.