Read Thado Chin Job 42 Bible Online

Job 42 - Thado Chin bible

Job 42

¹Chuin Job'in Pakai adonbutnin, aseije:

²Nangin ijakai nabol theijin, chule nalung ngaito jouse chu imachan adaltan theilou ahi, ti kahei,

³ Hetna neilouva thumop sella chu koiham? hijeh chun kahetkhen theilou, keija dinga thil kidang behsehho chu kanaseidoh-in ahi.

⁴ Ngaijin, nahenga katao ahi, keiman seijinge; keiman nahenga kangeh ding, chule nangin neiphondoh peh-in,

⁵Kakhojah theina nakhanga konin nangma chung changthu kanajan, tunvang kamitnin nangma amutai.

⁶Hijeh chun keima le keima kaki ki-dah in, leivuile vutlah-a kakisih-in ahi.

⁷Pakaiyin hiche thuho Job henga aseijou phatnin ahitin ahi, Pakaiyin Teman mi Eliphaz henga aseijin, nangmale nagolteni dounan kalungsatna akoujahtai. Ajehchu nanghon kasoh Job bangin keima chungthua thudih naseipouve.

⁸Hijeh chun tun nanghon bongchal sagile kelngoichal sagi kaijunlang, kasoh Job henga cheovin; nangho dinga govam thilto gatoh uvin; chule kasoh Job nangho dingin taovintin, ataona chu ama jeh-a kasanpeh ding ahi. Achutiloule kasoh Job banga kachung changthu adih-a naseilou jeh uva, nangolnao dungjuija kabolding ahi.

⁹Hitichun Teman mi Eliphaz le Shuh mi Bildad chule Naamath mi Zophar chu acheuvin, Pakaiyin athupeh dungjuijin abolun, Pakaiyin Job chu asampehtai.

¹⁰ Chuin agolho dinga atao phatnin Pakaiyin Job asohchanna-a konin akiledoh sahtan; Pakaiyin jong Job chu anei masah sanga ajatnia tamin abetan ahi.

¹¹Chujouvin asopi pasal ho jousele asopi numei ho jouse, chule masanga ama kihetpiho jouse ahenga ahungun, a-in'a chun changlhah anekhom mun; chuin amahon alunghem piuvin, chule Pakaiyin achunga thilse abol hojouse jehchun alhamonun, amitakipmin jong sumle sana bilba khatcheh apeovin ahi.

¹²Hitichun Pakaiyin Job chu ahinkho masalama sangin, ahinkho nununglama phatthei abohjon ahi. Ajehchu aman kelngoi sangsom le sangli, sangongsang gup, chule loukaithei cheh bongchal sangkhat, sanganpi sangkhat aneijin ahi.

¹³Aman chapa sagi le chanu thumjong aneijin,

¹⁴Chule aman apeng masapennu chu amin Jemima asah-in, chule aninanu minchu Kezia, cule athum nanu minchu Keren-happuch asah-in ahi.

¹⁵Chule gamsung pumpi-a chun Job chanute bangtah-a hoi aumpoi; chule amaho chu apauvin asopihou lah-a agouchan diu apecheh-in ahi.

¹⁶Hiche jouchun Job kum jakhatle kum somli ahingin, achapate le, achapate chate khangli geijin amun ahi.

¹⁷Hitichun Job tehkem keile, nikho lhingsetnin athitan ahi.