Read Thado Chin Job 5 Bible Online

Job 5 - Thado Chin bible

Job 5

¹Nangma nadonbut theiding khattou aumle tun kouvin; chule mithengho koi kom pena nakihei ding ham?

²Ajehchu lunghanin mingol chu athatjin, thangsetnan milungthim beipa chu athatjin ahi.

³Keiman mingol aki jungkho kamun; ahin phulou helouvin achenna kagaosap tai.

⁴Achate jong bitna-a konin agamlaovin, amaho kotpi phunga suhchipmin aumjiuvin, amaho huhdoh ding koimacha akimuji tapoi.

⁵Achang atsajong agilkelten anejou taovin, chule linglah jenga jong alakhomjin, gucha michom hon aneijouseu chu avallhum jitai.

⁶Thohgimnahi leivuilah-a kona hung ahilou vangin, chule gentheina jonghi leisetna hungkon ahilou vangin;

⁷Hitajongle meisi chunglama alentou banga, mihemhi thohgim ding monga penga ahi.

⁸Keiman vang Pathen holingting, chule Pathen henga kathuhi lhutning kate:

⁹Amachun thil len tahtah le holdoh jouhoi hilou thilkidang tamtah simjoulou abole.

¹⁰Aman leichunga go ajuhsahjin, loulaija twi ahinsolji:

¹¹Hichun mi noinungte tundoh ahinadiule, alunghemte chu hoina-a choisang ahina dingu ahi.

¹²Aman miduha thuh ho thilgon asumojin, hitichun atohgonu chu akhutnun atongtheiji tapouve.

¹³Aman michingho chu adohaovin amanjin, milung gilouho thilgon chu abungbun achuhsahjin ahi.

¹⁴Amaho nisa vah noija muthim toh akitoh-un, sunchangnoija muthim lah bangin akimailele jiuve.

¹⁵Ahin aman michaga chu ahatho khutna konle, akamuva kon chule chemjam'a konin ahuhdohjin ahi.

¹⁶Hitichun mivaichan kinepna aneijin, khan gitlouna chun akam ahuptai.

¹⁷Ven, Pathen'in asuhdih mi chu minunom ahi; hijeh chun hat chungnung gimbol nahi i-sah louvin koihih-in.

¹⁸ Ajehchu aman amavon, chule atompeh-in, asukhan, akhutnin adamsah kitji.

¹⁹Gentheina gup ma kona aman nahuhdoh ding; sagi na-a jong setnan natohkhah louding ahi.

²⁰Kellhah tengle aman thina-a kona nalhatdoh ding, chule galmuna chemjam thanei na-a kon nahuhdoh ding ahi.

²¹Miseiseho-a kona selthipma aum ding; gamna ahungteng jongle nakichat louding ahi.

²²Suhgamna le kel lhahna chu na nuisat ding; leiset gamsaho jong nakichat louding ahi.

²³Ajehchu loulai songhotoh nangman kiloikhomna nanei ding, chule gamlah saho chun nangma toh kichamna anei diu ahi.

²⁴Chule nahoubuh-a chamna aumding chu nahet ding, chule nachenna chu navil ding, chonset nabol louding ahi.

²⁵Chule nangman nachilhah ho letding jong nahetding, chule nachilhah hou chu leija hampa tobang ding ahi, ti nahet ding ahi.

²⁶Aphatcha kiloh changvui banga, nakum kilhin tenglebou nalhankhuh najotding ahi.

²⁷Ven, hichehi keihon kaholdoh-u ahi, hitichu ahi; ngaijin, nangma dinga pha ahi ti kihetnin.