Read Thado Chin Job 6 Bible Online

Job 6 - Thado Chin bible

Job 6

¹Ahin Job'in adonbutnin hitin aseije.

²O kagimna ho hi kito tohsel henlang, chule kahamsetnaho hi khaikotnin kilepto tavele!

³Ajehchu, tunvang hicheng pihi twikhanglen panga neldi sangin gihjonte; hijeh-a chu kathuseiho vallhuma um ahitai.

⁴Ajehchu hat chungnungpa thalchang chu kasunga aumin; agu chun kalhagao adonjou heltan, Pathen'a tijatnaho keidou dingin akigoltoh taove.

⁵Gamlah sangan chu hamhing neisasa pengji-am? ahiloule bongchal anehding chunga bu ngainam?

⁶Atamset thilchu chi beijin akinethei nadem? ahiloule ahtui podala atuina umam?

⁷Kalhan jong atohkhah nomlou thilho chu, keija din lungkham na-a dim anneh tobang ahi.

⁸O keiman ngehkhat kaneithei ding hihen, chule Pathen'in kadei thilchu eiphalpeh theiding hitavele!

⁹Pathen chun eisuhmang jenga lunglhai ding hijongle, chule aman akhut alha-a eitanboh ding hijongle!

¹⁰Chuteng keiman lhamona kanei nahlai ding, chule kagenthei na-a jong kakipa ding ahi; aman eihoidoh dahen, ajehchu keiman mithengpa thuho chu kana selgupoi.

¹¹Kathahat nahi ipi hija kakineppi ding ham? chule kaki chaina chu ipihija, keiman kahinkho kakisuhsao dingham?

¹²Kathahi songho banga tah hija, kasaphe hi sum-eng tobang ham?

¹³Keija hi panpina umlou ham? chihnahi keija kona kidelmanga hitam?

¹⁴Bolhesoh-a umpahi agolpa-a kona lungsetna chu vetsah ding ahi; ahinla aman Hat chungnung ginna chu adalhatai.

¹⁵Kasopi hon vachadung bangin kitahloutah-in eijoubolun, chule luidungho bangin alongmang taovin;

¹⁶Hicheho chu buhbang jeh-in avomin, chule asunga chun buhbangho kiselin;

¹⁷Amaho akisahjun phatle amangjitan, hichu asat tengle aumnaova konin amangthah jitaove.

¹⁸Achenau lampi chu akiheimangin, amaho hoima lhungjilouvin amangthahji taove.

¹⁹Tema galsat mihon aveovin, Sheba kiloihon amaho chu angah-uve.

²⁰Amahon akineppina anei jeh-un akisumo taovin, amaho khulama ahungun akisujum taove.

²¹Ajehchu tun nangho ima nahi tapouvin, nanghon eikiselhah namuvin, chuleh nakichataove.

²²Kahenga hinchoijun tia kasei khah em? ahiloule nanei uva konin lhatdoh man neipeuvin tia kaseikhah em?

²³Ahiloule melma khutna konin neihoidoh-un; ahiloule hat chungnung khutna konin neilhat doh-un katikhah em?

²⁴Neihilun, chule keiman kalei tuhtang ingkate; chule hoikoma chu kasuhkhel ham neihetchet sah-in.

²⁵Thudih hohi itobanga thaneija hitam! ahinla naminel nahou hin ipi aphatsah em?

²⁶Thu kisei hohi suhdih dinga nagel hih uva, chule kinepna neiloupa thusei chu hui tobangbou hitam?

²⁷Henge, pa neilou chu nasugimun, chule nagol diuvin kokhuh nalaijun ahi.

²⁸Hijeh chun tun lunglhaijun, keima neiveuvin; kajou ahile kicheh-in heuvin nate.

²⁹Hungkileuvin naheng uva katao ahi, khan gitlouna chu hidahen; henge, hung kile kitnun, kachon phatna chu hia chun aume.

³⁰Kaleijahi khan gitlouna umam? kathil patepna hin hetkhena tha aneilou hitam?