Read Thado Chin Job 7 Bible Online

Job 7 - Thado Chin bible

Job 7

¹Leiset chungahi mihem dinga phattep khat uma hilouham? anikhohi thalahpa nikho tobang hilouham?

²Soh-in nilim angaichat ten bangle, thalahpan atohman sanding avetlhih jing bangin,

³Hitichun panna beijin lha hijatpihi eiki chansah-in, thohgimna jan hijatpihi kadingin eikitep pehtai.

⁴Kalupteng itihle kathou kitdem katin, chule janhi itihle abeitadem? katin, chule khovah kahsen nungle ma-a kakileh humhal jengjin ahi.

⁵Katahsa hi lungle leivuijin atomin, kavunhi akeh-in chule kidah umtah asohtai.

⁶Kanikho hi ponkhong khothei sangin aleng gangjon, chule kinepna beijin akimang chaitai.

⁷Oh, kahinkho hi hui ahi ti geldoh jingun; kamitnin apha mukit taponte.

⁸Eimupa mitchun eimukit tapontin; chule namitnun eiventin, keivang ana um taponge.

⁹Meilhang amanthah a abeihel bangin, thikholkhula chelutsa chu ahungdoh kitjitapoi.

¹⁰A-in'a ahung kilekitji tapon; chule ama munin jong ama anaheta ponte.

¹¹Hijeh chun keiman kakam hupta pong ting; kalhagao hesoh puma thu kasei ding, kahinna natna jeh-a chu kaphun ding ahi.

¹²Keimahi twikhanglen kahia, ahiloule ngapi kahija, eingah ding kachunga nakoi ham?

¹³Kajalkhun in eilhamon nintin, chule kalupnahin kalunglhai louna olsah dominte kati tengle;

¹⁴Nangman mangin neikichat sah-in, munei na-in neitijat sah-e.

¹⁵Hitia chu kahinna hin, hin sanga kimeh lihle thi alhenjoh theina dinga nabol ahi.

¹⁶Hichehi kakidah-e, kahinbe nompoi; neichang lhaovin, ajehchu kanikhoho hi pannabei ahi.

¹⁷ Mihemhi ipi hija nangman nahiti choisanga, achunga nalungthim nakoijing ham?

¹⁸Jingkah sehle nangman amahi navil jinga, chule phattina napatep jingding ham?

¹⁹Itihchan keija kona chemanglouva na-uma, chule kachil kaval lhah kahse dinga jong neichanglha louding ham?

²⁰Kana chonsetai; nahenga ikatiding hitam, Vo nang mihem hinkho chingtup pa? ipijeh-a nangma douna melchihna khatna neikoija, hitachu keimahi keima dinga pohgih kahi hitam?

²¹Chule nangman ibolla suhkhel ngaidamlouva, keima khan gitlouna nalahmang louham? ajehchu tun keima leivui lah-a ihmutang kating, chule nangman jingkah le neihol ding, ahia keima ana umlou ding kahitai.