Read Thado Chin Job 8 Bible Online

Job 8 - Thado Chin bible

Job 8

¹Chuphatnin Shuhit mi Bildad chun adonbutnin, hitin aseije.

²Nangman itih chanpi hiche hohi nasei dingham? chule itih chanpihi nakamsunga kona hungpotdoh thuchenghi, hui hattah hungbang dingham?

³Pathen'in thutan lhahhi alehei khah-em? ahiloule hat chungnung chun thudih hi alehei khah em?

⁴Nachate ama douna-a achonsetnuva, chule asuhkhel jeh uva aman apaidohle,

⁵Nangman aphatcha Pathen chu naholkitna, chule hat chungnung henga chu taona nasemkitna ahile;

⁶Nangma nathem channa chule nathenna ahile, thonlouvin tun ama nangma dingin hung thoudoh intin, chule nachon phatna munchu khantousah tante.

⁷Nakipatna chu neocha anahijongle, nakichai na chu nasatah-a pungding ahi.

⁸Ajehchu nahenga katao ahi, khanglui lama miho chu kholin, chule apatehou chung changhi holdingin kigon,

⁹(Ajehchu eiho janhi mibou ihiuvin, chule ima ihepouve; ajehchu leisetna ihinkhou hi le-lim bou ahi.)

¹⁰Amahon nangma nahil louvu, naseipeh louvu, chule alunguva kona thu naseipeh lou dingu ham?

¹¹Doplah louva phaipheng kehtheijam? twi beija peng kehthei ding hinam?

¹²Satlhah louvin ado hingpet jong, hamhing dangho sangin agoplha masaji taove.

¹³Pathen sumilho jouse lamlhah chu hitichu ahin; chule miphalhem pa kinepna jong mangthah ding ahi.

¹⁴Amapa kinepna chu suhbeijin umintin, chule aginchatna chu maimom pan tobang ding ahi.

¹⁵Ama a-in'a kingai jintin, ahivangin hichu dingjou louding; aman hatah-in tuhchah intin, ahivangin pangjou louding ahi.

¹⁶Ama nisat masanga ahingsetnin, chule honsunga konin abah ajamdoh-in ahi.

¹⁷Ajungho chu song lah-a ajam lutnin, chule songho lah-a chun mun aveove.

¹⁸Aman amuna konchun sumang taleh, hichun ama seilep mintin nangmahi kamukha hihbeh-e, tinte.

¹⁹Ven hichehi ama kipana lampi chu ahin, chule leisetna konin adangho hung kehdoh tante.

²⁰Ven Pathen'in miphachamkim chu apaidoh louding; chujongle khanset bolpa chu akithopi louding ahi.

²¹Aman nakam nuina-a adip dima, namuh kipana-a adipdim kahse-a,

²²Nangma nahotbol teho chu jachatna-a kivona, chule mikhang gilou chenna munchu imalou hungsoh ding ahi.