Read Thado Chin Job 9 Bible Online

Job 9 - Thado Chin bible

Job 9

¹Chujouvin Job'in adonbutnin, hitin aseije.

² Hichehi thutah ahi ti kahei: ahivanga Pathen angsunga koiham them changjou dinga?

³Aman ama kinahpi goleh, sangkhat lah-a khat jong donbut theiponte.

⁴Ama lungthima chingtah, tha-a hattah ahin, ama douna-a kilungtahsah-a khangtouva koi umam?

⁵Molsang ho achon mangin, amahon ahepouve; aman alunghan na-in amaho aleh khupmin ahi.

⁶Aman leiset hi aumna mun'a konin ahot lingjin, chule chua akhomho chu akilingjin ahi.

⁷Aman nisa thu apen nisa asohji tapoi; chule ahsi ho namdet anam khumjin ahi.

⁸Amabou chu vanho phajala, chule twikhanglen kinongho chotpha a chu ahi.

⁹ Aman sahlam valpa, Juheisuhtun, Bombel, chule lhanglam ahsi umna jousehi asem ahi.

¹⁰Aman mudohjoulou thillen abolin; simjoulou thil kidangho jong abolin ahi.

¹¹Ven, ama kakom tah-a achen, ahinla kamupoi; chule ama achepeh jengin, ahinla kahekhen theipoi.

¹²Veuvin, aman akilah mangleh koiham akhamtheija? koiham ajah-a ipi nabol ham tithei dinga?

¹³Pathen chun alunghana alahdohji loutengle, mi kiletsahte kithopi ho chu anoija akunjiuve.

¹⁴Keiman ijatna lhoma ama kadonbut dingham? chule amatoh kihouna dinga thucheng ijat kaki lhendoh dingham?

¹⁵Keima dihlheh jongleng ama donbut pongkating; ahinla keima kathutan dingpa henga taona neijo tange.

¹⁶Keiman ama kou ingting, aman eidonbut jongle, aman ka awchu einangai peh-e ti gingcha ponge.

¹⁷Ajehchu aman huipi le go kithon keima eisuchipmin, chule ajehbeijin kamaha put apunsahbe-e.

¹⁸Aman kahaina kalah ding eiphalpon, ahinla genthei na-in eidipme.

¹⁹Keiman hatna thu seijong leng, ven, ama ahatne; chule thutanna tijongleng, koiham thu kasei theina dinga phat eipeding.

²⁰Keima them kichan jongleng, kakam sungin mo-eichan intin; keima kacham kimme tijong leng, hiche jongchun kalhin lelna eiphot chetpeh bepding ahi.

²¹Keima ana chamkim nama jongleng, kahinna hi hedehpong kating, kahinkhohi nahsahmo bep ingkate.

²²Hichehi thilkhat ahi; hijeh-a chu hichehi kasei ahi, aman michamkim pa le mikhang giloupa asumang gele.

²³Hitichun phulou helouvin kijepna-in kijeplih jongle, aman themona neiloupa thukitan chu anuisat bepding ahi.

²⁴Leiset hi agiloupa khutna kipedoh ahin, aman thutan ho maichu atoma, hichu ahiloule, hoija, koiba hijaham?

²⁵Tun kahin nikhohohi thangkouva lhaipa sangin aman gangjon, amaho aphajong muman louvin alengmang jitai.

²⁶Kongho mangang tah-a akitolmang jeljel bangle, mulaopin anehding amat dinga amangan bangin agangin ahi.

²⁷Keiman kakiphin nahi sumiltange, kagihsatna hohi dalhang ting, chuleh keima kilhamon tange titaleng;

²⁸Keiman kagenthei naho jousehi kakichan, nangman themona beija neikoi deh louding ahi ti kahei.

²⁹Keima mikhang gilou khat kahile, ipijeh-a pannabei ja kakisuhboi ham?

³⁰Buhbang twijin kisilha jongleng, kakhut hohi hibang tah-in thengkha hih jongle;

³¹Hijongleh, nangman kokhuh sunga neiphumlut teijin natin, chule kapon jengtah jonghin eithetbol ding ahi.

³²Ajehchu ama kadonbut theiding le, thutan na-a kache khompi theiding, keitobang mihem ahipoi.

³³Kachung cheh lhonna akhut lhathei ding, kakahlhona palai dingjong aumpon ahi.

³⁴Aman amol lhon keija konin ladohhen; chule ama kichatna hin eitijatsah dahen;

³⁵Chuteng keiman thu seijing ting ama kichataponge; ahin keima kachuti theipoi.