Read Thado Chin Labu 102 Bible Online

Labu 102 - Thado Chin bible

Labu 102

¹Vo Pakai kataona ngaijin lang, kakouna naheng hunglhung hen.

²Kalungkham nileh keija konin namai selmang danlang, keilam ngan nana hinsungin, nangma kakou nileh neidonbut loijin.

³Ajehchu kahin nikhoho hi meikhu bangin akitol mangin, chule kaguhohi thuhsunga mei bangin akan ahi.

⁴Kalunghi agentheijin hampa bangin agolhatan, ka changlhah nehding kasuhmil lotan ahi.

⁵Kahimsat husa gin jeh-in, kaguho jong kavunna abehchah gamtai.

⁶Keima gamthipma vamuhsao bang kahitan nelgama sumbupi bang kahitai.

⁷Kahah jingin, intingvuma pelpa changlhat bangbep kahitai.

⁸Kamelma ten eihouse nilhum jiuvin, chule kachunga kingolsah ho keima dounan akihahsel jiuvin ahi.

⁹Ajehchu vut hi changlhah bangin kanejin, chule kadon ding chu ka-na toh kachoh haljin,

¹⁰hichu nalung nopmo le nalunghan jeh ahi; ajehchu nangin neidom sangin chule neiseplhan ahi.

¹¹Kanikhoho jong le-lim kiheimang bep ahin, chule hampa bangin kagopjitai.

¹²Ahinla Vo Pakai nangvang a-imatih chana umding nahin, chule nangma khang jouse-a kigeldoh jingding nahi.

¹³Nangma thouvinnatin, Zion chunga hepina nanei ding; ajehchu ama lungsetna phat, henge, phat kitepsa chu ahunglhung tai.

¹⁴Ajehchu nasohte amanu songho-a chun alunglhaijun, chule chua leivui chu akhohsah-un ahi.

¹⁵Chutia chu Pathen hephalouhon Pakai min chu agin diu, chule leiset lengho jousen naloupina chu agindiu ahi.

¹⁶Pakaiyin Zion asahdoh tengle, aloupi na-a hungkilah ding ahi.

¹⁷Aman milengvai ho taona angai ding, chule ataonao ngaisah louva akoi louding ahi.

¹⁸Hichehi khangkitna dinga kisun ding; chule ahung kisem ding miho chun Pakai chu avahchoidiu ahi.

¹⁹Ajehchu aman amuntheng sanga konin ahin vesuh-in, Pakaiyin van'a konin leihi ahinmui;

²⁰Sohchangho himsatna ngaidingle, thidinga thu kitepsaho lhadohnadin;

²¹Zion'a Pakai min le Jerusalem'a ama pachatna chu phondohna dingin;

²²Lenggam ho le mitin Pakai jenna dinga akikhopkhom tenguleh, hichu hiding ahi.

²³Aman lamdunga kahatna asudoijin, kanikhoho asuchomin ahi.

²⁴Keiman, Vo ka Pathen, kahinna akimtuh in neilamang hih-in, nangma kumho chu khang jouse lhumkeija uma ahi, kati.

²⁵ Leiset bul kingapna chu malaija nakoisa ahitan, chule vanho jong nakhutsoh ahi.

²⁶Amaho mangthah diu ahin, ahinla nangvang umjing ding nahi, henge, amaho ponlui banga sesohdiu, von banga nangin amaho nakhela, chutia chu amaho kikheldiu ahitai.

²⁷Ahinla nangvang angai nahi jingin, nakumin jong kichaitih aneilouding ahi.

²⁸Nasohte chateho chu umjing uva, chule achilhahteu chu namasanga kitungdoh diu ahi.