Read Thado Chin Labu 103 Bible Online

Labu 103 - Thado Chin bible

Labu 103

¹David Labol Vo kalhagao, Pakai chu choi-an nin, chule kasunga umjousen amintheng choi-an nun.

²Vo kalhagao Pakai chu choi-an nin, chule aphatchom naho jouse sumil hih-in.

³Nakhan gitlouna jouse ngaidama, nanatna jouse damsah-a,

⁴Nahinkho manthah na-a kona lhatdoh-a, ngailut phatna le hepina lal lukhuh banga nakhuh peh-a,

⁵Nakhang donlai muvanlai banga semthah ahina dinga, thilphaho-a nakamsung lunglhaisahpa chu ahi.

⁶Pakaiyin chonphatna atah langin, suhgentheija umho jouse dingin thu adih-in atan peh-e.

⁷Aman alampiho Mosi henga ahetsah-in, anatohho Israel chate ahetsah-in ahi.

⁸ Pakai chu hepina le lungsetna-a dim, lunghangvah lou chule ngailutna-a dimset ahi.

⁹Aman phatjousen eiho eiphohjing pouvintin; chujongle a-itih in alunghana chingjing ponte.

¹⁰Aman ichonsetnao bangin eibol pouvin, chujongle ikhan gitlounao dungjuijin jong eilethuh pouve.

¹¹Ajehchu leisanga van asan banga, ama gingte chunga ahepina chubanga chu lena ahi.

¹²Solam le lhumlam akigamlat banga, hichan gamla-a chu ikhan gitlounao eihoa kona achonmang ahitai.

¹³Mipan achate akhoto banga, Pakaiyin ama gingte akhoto ahi.

¹⁴Ajehchu aman ikisuhto dannu ahen, eiho leivuibou ihiu aman ageldoh jingin ahi.

¹⁵Mihem vang, anikhoho chu hampa bangbou; jaova pahcha bangbep bou ahin, hitichun ahung khangin ahi.

¹⁶Ajehchu huijin achung ahin mutle amang gamin, chule aumna mun chun ahepha ji tapoi.

¹⁷Ahinla Pakai hepina chu ama gingte chunga atonsot atonsot geija umding, chule achonphatna jong achateu chateho geija;

¹⁸Akitepna chingtupma, chule athupehho juidinga geldoh jingho chunga umding ahi.

¹⁹Pakaiyin van ho-a alaltouna atungdoh-in, aleng gamin imajouse chunga vai apoi.

²⁰Nangho thahat chungnung nei, athupehho bola, a-thu ngaija avantil hon, Pakai chu vahchoijun.

²¹Nangho ama janel ho, ama lhachaho, ama lunglhaina bolho jousen, Pakai chu vahchoijun.

²²A vaihomna muntina athilbolho jousen, Pakai vahchoijun. Vo kalhagao Pakai chu vahchoijin.