Read Thado Chin Labu 104 Bible Online

Labu 104 - Thado Chin bible

Labu 104

¹Vo kahinna, Pakai chu vahchoijin. Vo Pakai ka Pathen, naloupi lheh jengin, janale loupina-in nakijeme.

²Vanho pondal banga kaijal pan, khovah chu ponsil bangin naki sile.

³A-in danho-a inkamho chu twilah-a ajama, meilhang ho kangtalai jin akiseme, hui lhavingho chunga vahle pa.

⁴ Avantilho lhagaoho sempa, alhachate jong meikong sosah jipa.

⁵Nangma tonsotna akichon lounadinga, leiset bulho anaphut detpa.

⁶Nangman hichu thutah-in ponsil bangin nakhu khumin, twiho chu molsangho vuma akiting uve.

⁷Nangman naphoh-in ahile amaho ajamun, na van ginho-a amaho ajammang loiji taove.

⁸Amaho molsang ho-a akaltouvun, amaho dinga nagonpeh namun, phaicham ho-a chun achesuh jiuvin ahi.

⁹Leiset chupdinga ahungkile louna diuvin, ahin khelthei loudiu gamgi nasempeh-in ahi.

¹⁰Aman lhang ho-a twisam longho chu, phaicham lama asolin ahi.

¹¹Hicheho chun gama saho jouse donding apeuvin; gam sangan dangchah hon dangnou nan aneijuve.

¹²Apang chu chungleng vachaten chenna-in aneijun, thingbah holah-a chun la saove.

¹³Aman a-in danho-a konin lhangho achapnouvin, leiset hi nanatoh ga ho-a alunglhai uve.

¹⁴Aman leisetna kona nehding akondoh nadingin; ganchaho dingin hampa akedoh sah-in, chule mihem neh dingin anche akesah-in;

¹⁵chule mihem lung kipasah lengpitwi, chule amaivahna ding thao, chule mihem lungthim hatsah-a changlhah jong ahinsodoh sah-in ahi.

¹⁶Aman Lebanon'a Cedar thing aphuho; Pakai thingphung ho chu twi akichap nou jinge;

¹⁷Hia chun vachaten bu asaovin, twiva dingin vang chahthinglah chu a-in ahi.

¹⁸Lhangsang ho chu gamkelcha ho ding ahin, jupi ho dingin songpiho chu kiselna ahi.

¹⁹Phatbih hetnading lhathah aumsah-in, nisan alhum phat akihetne.

²⁰Muthim nasemin hichu jan ahin, hia chun gammanga sajouse ahung kitholdoh jiuve.

²¹Keipi donglaihon asamat dingu akitum khumun, Pathen'a konin anehdiu akiholuve.

²²Nisa asoteng akikhom khomun, akulsung cheh uva akolji taove.

²³Miho chu natong dingin akon doh-un, nilhah kahsen na atong jiuvin ahi.

²⁴Vo Pakai nathilsem hohi iti tamma tam hitam! abonchauva chihna-a nasem ahin, leiset hi nahaona-a dimset ahi.

²⁵Chutia chu hiche twikhanglen lentahle jaotah hi uma, asunga akithol thoho simjoulou uma, ganhing alen le aneo agoma uma ahi.

²⁶ Hia chun kong innei akitolin, chuche sunga kichem dinga nangin nasem Leviathan chu aume.

²⁷Hicheho jousen aphatcha a-an'u napeh theinadin, nangahcheh uvin ahi.

²⁸Napeh ho chu amahon akhom tupmun, nakhut najalin neh tuitah-in avaset uve.

²⁹Namai naselin alungkham jiuvin, ahaitheinau na lahmang peh-in, athi jiuvin chule leivuijin akileji taove.

³⁰Nalhagao nasoldoh-in amaho akisem doh jiuvin, chule leiset chunghi nasemthah kitjin ahi.

³¹Pakai loupina chu tonsotnin umintin, Pakai chu athil bolho-a kipahding ahi.

³²Aman leiset chung aven ahile akihot jengin; lhangho atongkhan ahile mei akhun ahi.

³³Kahinlaisen Pakai henga la sangting, kahinpet nin ka Pathen vahchoi la sange.

³⁴Ama chung chang kangaito nahi ahenga lhumin tin, Pakaiya kipahding kahi.

³⁵Michonse ho chu leija konin suh mangin umhen, chule migilou ho umkit tahih uhen. Vo kahinna, Pakai chu choi-anin. Vahchoijun Pakai chu.