Read Thado Chin Labu 105 Bible Online

Labu 105 - Thado Chin bible

Labu 105

¹Pakai henga thangvahna peuvin! aminin taovun; mihemte lah-a athilbol hetsah-un.

²Ahenga la saovin, Ahenga vahchoi La saovin, athilkidang bol ho jouse thu kihoulimun.

³Amintheng chu loupihen, Pakai holho lungsung kipahhen.

⁴Pakai le ahatna holunlang, tanglouvin amai chu holjingun.

⁵Akamsung thutan lhahho, athil kidangho, atohsa anatoh kidangho geldoh-un,

⁶Vo nangho Abraham chilhah asohte, alhentum nangho Jacob chaten sumil hih-un.

⁷Amachu Pakai i-Pathen'u ahin, athutan lhahho chu leichung jouse-a aumme.

⁸Atonsotnin akitepna ageldoh jingin, kum asang asang dinga aman anatep ahitan ahi.

⁹ Abraham toh asem kitepna, chule Isaac henga akitepna;

¹⁰ Chule hiche mama chu Jacob dinga danthua din, Israel henga tonsot kitepna din asuhdetpehtan,

¹¹Kanaan gamchu nachan ding gouva nahenga kapeh ding ahi ati;

¹²Amaho lhomcha bou anahiuvin; henge, lhomcha khat le khopem mi anahiuve.

¹³Amaho nam khatna kona nam khatna, lenggam khatna kona midang henga achele laijun,

¹⁴ Koiman jouva aboldiu aphalpon, amaho jeh-in lengho aphohsaljin;

¹⁵Kathaonupa chu tongkha hih-un, chule kathemgao ho susehih-un, ati.

¹⁶ Achung chonin chuche gama chun kel alhahsah-in; changkung jouse amanthahsah soh heltan ahi.

¹⁷ Amasanguva mi khat asolmasan, sohdia kijoh-a Joseph chu ahin,

¹⁸ Akengho chu bullin asunaovin, thihkul sunga ahenun ahi.

¹⁹Ama thu aguilhun kahsen, Pakai thu chun ama apatepmin ahi.

²⁰ Lengpan mi asolin alhadoh-in, miho vaihompatah chun agalha dohtai.

²¹ Aman a-insung pakai jin apansah-in, chule aneijouse chunga vaihom din;

²²Pipuiho chu anop nopma kan dingle, vaihomho chihna hil din apansah tai.

²³ Israel jong chu Egypt'a ahungtan, Jacob chu Ham gama ahung jintan ahi.

²⁴ Aman amite nasatah-in apunsah-in, amelmate sangin ahatsah jotai.

²⁵Asohte doha thuhtah-a abolna dingun, aman alungu chu amite hotbol din aheimangpeh tai.

²⁶ Aman asoh Mosi, chule amilhen Aaron chu anasolin ahi.

²⁷Amanin amelchihnaho alah uva abol lhonin, chule thilkidang ho Ham gamsunga avetsah lhone.

²⁸ Aman muthim asolin mu athimsahtan, chuin athu chu adou tapouvin ahi.

²⁹ Aman atwi hou thisan asosah-in, anga hou athat gamtai.

³⁰ Agamu chun uphoh tamtah ahin pendoh sah-in, leng teho indan sung geijin adimtan ahi.

³¹ Thu aseile thousi jatchom chom tamtah ahungun, chule kha jong agamkol sungu ahung dimtan ahi.

³² Aman amaho chu go khelin gel apen, chule agamuva meikou jengjung apen ahi.

³³Aman alengpi guihoule atheichang phunghou jepna apen, agamkol sunguva thingphung ho amanthahsah gamheltai.

³⁴ Aman thu aseile khaokhoho ahunguvin, khaokho noute simjoulou ahungdoh uvin,

³⁵Chuin agamsung uva hampa louhing jouse anejouvun, aleisetnu theiga jouse anechai taovin ahi.

³⁶ Aman agamsung uva athahatna jouse bulpi, apengmasa jouse jongchu asumang heltan ahi.

³⁷ Aman amaho sana le dangka pumin ahinpui doh-in, aphung sunguva chun achatmo khatcha aumpoi.

³⁸Amaho apotdoh uva chun Egypt akipah-e; ajehchu amaho kichatna chu achunguva chu-ah ahitai.

³⁹ Akhu diuvin meilhang apha jal-in, janteng asalvah diuvin meikong apen ahi.

⁴⁰ Mipi hochun athumun, vengke ahinpen, van changlhah-in alungu alhaisah tai.

⁴¹ Songpi ahonle, twi ahung kikhodoh-in, gamgo munho-a vadung lonin alongin ahi.

⁴²Ajehchu aman athutep thengtah le, asoh Abraham chu ageldoh jing ahi.

⁴³Amite thanom tah-in ahin puidoh-in, chule amilhenho kipahtah-in apuidoh-e.

⁴⁴ Aman Pathen hephalou te gam chu amaho apen; amahon chua miho tohdohsa chu alotauve;

⁴⁵Chutia chu amahon achondan kisemho ajuijuva, adan thupeh ho anit nadiuva apeh ahi. Pakai chu vahchoijun.