Read Thado Chin Labu 106 Bible Online

Labu 106 - Thado Chin bible

Labu 106

¹ Pakai chu vahchoijun. Oh, aphatna jeh-in Pakai chu thangvahna peuvin; ajehchu amihepina tonsotna umjing ahi.

²Pakai natoh thahatna chu kon seithei jintem? Avahchoina jouse kon aphondoh jouding ham?

³Thutandih tuhchah-a chule phat tinna chonphatna bolho chu anunnom ahiuve.

⁴O Pakai, namite chunga nanei lungsetna-a chun neigeldoh jingin, O nahuhhing nan neivilin,

⁵Chutile nami lhentumte hamphatna kamuthei ding, namite kipana-a kathanop thei ding, nagou chan toh kaloupi ding ahi.

⁶Kapu kapateu toh kana chonseuvin, kana khang gilouvun, kana khanse taove.

⁷ Kapu kapa teuvin Egypt'a nathil kidangho ana hethei pouvin; nahepina tamtah chu ageldoh pouvin, amavang twipi le twipi san ngeija chun ama ana lungsat sah taovin ahi.

⁸Hijeng jongle athil boltheina loupitah chu hetdoh ahina din; amin jal-in amaho chu ana huhdoh-e.

⁹ Twipisan jongchu apho-in ahile akang tan; chutichun amaho chu gamthip laija apui bangin, twi thuhtah-a chun apui galkai tai.

¹⁰Ahotbolteu khutna konin ahuhdoh-in, melma khutna konin alhatdoh-in ahi.

¹¹Chuche twi chun amelmateu achupmin; khatcha asohcha aum pouve.

¹² Chujouvin athu chu atahsanun, ama vahchoi la asaove.

¹³Anatohho asumil loijun; athumop chu angah tapouvin ahi.

¹⁴ Gamthipma chun tahsa ngaichatnin adimun, nelphaija chun Pathen apatep taovin ahi.

¹⁵Chuin athil thumu apen, ahivangin asunguvah gamna hise alansah in ahi.

¹⁶ Amahon gebuh sunga Mosi, chule Pakai mitheng Aaron jong chu athangset taovin ahileh;

¹⁷Leiset akhikeh-in Dathan aval lhumin, Abiram loiho akhukhum tai.

¹⁸Aloi lah uva mei ahung kadoh-in, meikong chun migilouho chu akalihtai.

¹⁹ Amahon Horeb'a akilhajol bongnou lim asemun, alim semthu uchu ahou taove.

²⁰Chutobang chun aloupinao chu bongchal hampane bangbepmin akhel taovin ahi.

²¹Egypt'a thil loupitah tah bola Pathen, ahuhhingpao chu asumil taovin;

²²Ham gama thilkidang tahtah le, twipisana kichat umtah bolpa chu asumil taovin ahi.

²³Hijeh chun mipi chu sumang khante tia alunghana heimang dinga alhentum Mosi chu amasanga chu akah uva ding louva hile, amaho chu sumang tange anati ahitai.

²⁴ Henge, amahon gam nomtah chu i-sah louvin abulun, athu chu atahsan pouve.

²⁵Ahivangin apon in sunguva aphunchel uvin, Pakai aw chu angai pouvin ahi.

²⁶Hijeh chun gamthip laija amaho suhlhuhna dingin, amaho dounan akhut alam tan,

²⁷ Achilhahteu jong namtin lah-a asuhlhuh nadingle, namtin lah-a athecheh nadinga akhut alap ahi.

²⁸ Amaho Peor mun'a baal lama abeh-un, athiho dinga ganlhaina kibol chu anetaove.

²⁹Chutichun anatohho uva chun ama aphinseuvin, chule achunguva hise alengtai.

³⁰Chujouvin Phinehas adingdoh-in thu atantan; chuin hise chu atangtan ahi.

³¹Hichu ama dingin a-imatih chana khang jouse-a dingin chonphatna-a sim ahitai.

³² Kinahna twiphunga [1] jong chun alunghan sah-un, chutichun amaho jeh-in Mosi chunga thilse alhunlo helin;

³³Alhagao aphinset jeh-un, akamin thilsetah anaseitan ahi.

³⁴ Pakaiyin amaho thu apeh bangun, amahon namho chu anasumang pouve.

³⁵Ahivangin Pathen hephalouho toh akihalun, athil bolhou chu ajil jotaovin ahi.

³⁶Chule amilimhou chu ajenun, hichu amaho dingin thang ahung hitai.

³⁷ Henge, amaho thilha henga achapateu le achanuteu chu ganlhai thilto dingin apedoh-un,

³⁸ monabei thisan, achapateule achanuteu thisantah chu asouvin, hicheho-a chun Canaan milimho henga akilhaijun; chuche gam chu thisana suhboh-in aumtan ahi.

³⁹Chutichun anatohtah uchun akisuboh-un, athil boldoh uva chun noti'n apang taovin ahi.

⁴⁰ Hichejeh-a chu Pakai lung hanna chu amite chunga meikou banga anakou doh-a, chubang tah-a agoulote tah chu athet ahitai.

⁴¹Chuin amaho chu Pathen hephalouho khutna apedoh-in, ahotbolteu chun achunguva vai ahomtai.

⁴²Amelmateu jongchun asugentheijun, akhut noijuva suhnemin aum taovin ahi.

⁴³Amaho chu avel velin anahuhdoh-in, ahinla alung ngaitouvin alunghan sah-un, khangitlouna jeh-in suhnemin aumjiuve.

⁴⁴Hijeng jongle aka-u ajah jiteng, ahesohnau akhohsah jin;

⁴⁵Akitepna chu amahodin ageldohjin, ahepina hao dungjuijin alung aheijitai.

⁴⁶Sohchanga akaihou jouse jong chun amaho akhotosah-un ahi.

⁴⁷ O Pakai ka Pathen'u, neihuhhing un, chule namin theng thangvah dingle navahchoi na-a galjou dingin, Pathen hephalouho lah-a konin neipui khom un.

⁴⁸Pakai Israel Pathen chu tonsotnapat tonsot geijin vahchoijin umhen: chule mijousen, Amen, tiuhen. Pakai chu vahchoijun.