Read Thado Chin Labu 107 Bible Online

Labu 107 - Thado Chin bible

Labu 107

¹ O aphatna jeh-in Pakai henga thangvahna peuvin, ajehchu ahepina a-imatih chanin aum jingin ahi.

²Melmaho khutna kona alhatdoh, Pakai lhatdamsaten hitichun seijuhen;

³chule gamtin solam le lhumlam, sahlam le lhanglama konin amaho kikhomuhen.

⁴Amaho gamthip mi chekhah louna lampia avahleuvin, chenna ding khopi khatcha amu pouve.

⁵Gilkel le dang chah-in, asunguva ahinnao alhasamtai.

⁶Chuphatnin Pakai henga lungkhamin ataovun, aman ahesoh naova konin anahuhdoh tai.

⁷Mi chenna khopi-a achetheina diuvin, lampi dih-a apuijin ahi.

⁸Mihemte hin mihem chate henga, aphatna jehle athil kidang bolho jeh hin Pakai chu vahchoi taveleu, o!

⁹Ajehchu aman lhagao ngaichat alunglhai sahjin, lhagao gilkel an pha phan avahvajin ahi.

¹⁰Muthim le thina le-lima touva, suhgentheina le thihkhaova kihenho chu,

¹¹ajehchu amahon Pathen thu douna-a gol akeh-un, chungnung pen thuhil anahsah pouve.

¹²Hijeh chun alungu tohgimna-in ason kun-in, apanpidiu khatcha aumpon, alhasuh taovin ahi.

¹³Chutengle lungkhamin Pakai henga apengun, aman ahesoh naova konin ahuhdoh jin ahi.

¹⁴Aman muthima konle thina lima konin apuidoh in, chule akihen nahou chu asuchip jin ahi.

¹⁵Mihemte hin mihem chate henga, aphatna jehle athil kidang bolho jeh hin Pakai chu vahchoi taveleu, o!

¹⁶Ajehchu aman sum-eng kotpiho aphusen, thih banggolho asatkhen tan ahi.

¹⁷Mingol ho chu asuhkhel nao jehle, akhanset jeh uvin suhgentheijin aumuvin ahi.

¹⁸Ahin naovin an jatjouse atheuvin, chule thina kotpiho lam chu anai jiuvin ahi.

¹⁹Chutengle lungkhamin Pakai henga apengun, aman ahesoh naova konin ahuhdoh jin ahi.

²⁰Ama thu asolin, amaho asudamjin, amanthah naova konin ahuhdoh jin ahi.

²¹Mihemte hin mihem chate henga, aphatna jehle athil kidang bolho jeh hin Pakai chu vahchoi taveleu, o!

²²Amahon thangvahna ganlhaina-in ganlhaina neiju henlang, athilbolho chu thanom tah-in phongjal uhen.

²³Twikhanglen lama kong inneija chesuh-a, twipi nasatah chunga sumkolvei ho,

²⁴Amahon Pakai thilbolho le, twi thuhtah sunga athilkidang bolho chu amuvin ahi.

²⁵Ajehchu aman thu apeh leh huile go nasatah ahung kithojin, hichun twipi kinong chu adomsang jin ahi.

²⁶Hicheho chu van lama akinongtou jin, twi thuhtah-a akumsuh kitjin; ahinnao lungkham jeh-in ajunlha jitai.

²⁷Suhle tungin akipeijun, jukham bangin alon lele uvin, achihnao kichaina-a um ahitaove.

²⁸Chutengle lungkhamin Pakai henga apengun, aman ahesoh naova konin ahuhdoh jin ahi.

²⁹Aman huile go athipsah-in, chutichun twipi kinongchu atangtan ahi.

³⁰Chuin athiptah jehchun akipah-un, chutichun adeinau kaimun geichun apui lhungtan ahi.

³¹Mihemte hin mihem chate henga, aphatna jehle athil kidang bolho jeh hin Pakai chu vahchoi taveleu, o!

³²Amahon amachu mipi kikhom lah-a jong choisangu henlang, upaho kikhopna-a ama chu vahchoi uhen.

³³Aman vadungho gamthip asosah-in, twisamho tolgo asosah-in;

³⁴Asunga chengho khangitlou jeh-in, gam phalai chu gamtem asosoh tan ahi.

³⁵Aman gamthip chu twikul asosah-in, tolgolai chu twinah putna asosah jin ahi.

³⁶Chenna ding khopi akigon theina diuvin, chua chun gilkelho achensah-in;

³⁷Chule ga tamtah punsah dingin, lou aboluvin, chule lengpithei aphut uvin ahi.

³⁸Amaho nasatah-a apuntheina dingun phatthei jong aboh-in, aganchahou akemsuhsah nompoi.

³⁹Avelin, amaho suhgentheina, hesohna, chule lungdona jeh-in, amuisuh tultulun suhnemin aumuve.

⁴⁰Aman lengchapate chunga noisena abunglhan, lampi kamhel gamthipma avale sahtai.

⁴¹Ahinla gentheiho chu hesohna-a konin munsanga akoijin, kelngoihon tobangin insung asempeh-in ahi.

⁴²Michonpha hon hichu amu uva kipah diu, chule khan gitlouna jousen akam akihup diu ahi.

⁴³Michingho jousen hiche hohi anit dingu, chule Pakai mingailut khotona chu ahet dingu ahi.