Read Thado Chin Labu 109 Bible Online

Labu 109 - Thado Chin bible

Labu 109

¹David Labol Kavahchoi jing, vo Pathen, neithipsan hih-in;

²Ajehchu kei douna-in mi khang gilouhole mi lhemlha ho akamkaovin; aleijun keima dounan jou aseijun ahi.

³Amahon hotna thun eium kimvelun, ajeh beijin eikisat piuve.

⁴Ajehchu kangailut amaho kamelman apangun, ahinla keima taona lama kakipen ahi.

⁵Amahon phatna chu setna-in, ngailutna chu hotnan eilethuh taovin ahi.

⁶Ama chunga mikhang gilou koijin lang, akhut jet lama Satan dinghen.

⁷Athu kitan tengle themmo chansah inlang, ataona chu chonset soh hen.

⁸ Ahin nikho lhom henlang, anatohna mun midang changhen.

⁹Achate pabei hiuhenlang, ajinu meithai hihen.

¹⁰Achate chu tanglouva vahveile khutdo hiuhenlang, mun gohkeoho-a chun changlhah kihol uhen.

¹¹Hunam thilchom hon aneijouse lahpeh hen, gamchom min atohgimga kichomhen.

¹²Ahenga hepina musah koimacha umhih hen, pabei chate lainatpi ding jong umda hen.

¹³Aphattheina suhtanin umhen lang, khang hunglhung dinga aminu noimangin umhen.

¹⁴Apateu khan gitlouna Pakai anga geldoh-in umhen, chule anu chonset noimangin umhih hen.

¹⁵Leisetna kona amaho hetjingna asuhtan theina dingin, amaho Pakai anga umjomjing taohen.

¹⁶Ajehchu hepina musah ding geltah sangin, vaicha lhasam abol gentheijin, aman alunghesohho jong chu athatnin ahi.

¹⁷Mi gaosap ding adeibang chun, hichu amachunga chuhen, phattheiboh adeilou bangin, hichu ama-a konin gamlahen.

¹⁸Ponsil banga gaosapna akivon ahin, chutichun hichu a-oi sunga twi bangin luthen, chule agu sunga thao bangin luthen.

¹⁹Hichu amadin akikhu khum ponsil bangin umhen lang, akigah jing konggah dingin umjing tahen.

²⁰Hichu Pakaiya kona kamelmate leh, kahinna douna-a thuse seiho lethuhna hihen.

²¹Ahinla vo Pakai Pathen, namin jal-in neibol peh-in, ajehchu nahepina aphat jeh-in neihuh doh-in.

²²Ajehchu keima vaichale lhasam kahin, kalung thim hi mavo-a uma ahitai.

²³Keima le-lim kiheimang banga chemanga kahitan; khaokhopi banga chungle noija kipeile kahitai.

²⁴An ngol jal-in kakhup angoijin, kasa hin thaona apu tapoi.

²⁵ Keima jengjong amaho i-sah louvin kaumtan; eiveovin alu eithinkhum jiuvin ahi.

²⁶Vo Pakai ka Pathen, neipanpin, nami hepina dungjuijin neihuhhing in.

²⁷Hichehi nakhut ahi ti amahon ahet theijuva, Pakai, nangman nabol ahi, ti ahetna diu ahi.

²⁸Amahon gaosap muhen, ahinla nangin phatthei boh-in, amaho ahungtho tengule, jahchao hen, ahinla nalhachapa kipahhen.

²⁹Eidouho chu jachatna-in kivon henlang, sangkhol len ah bangin akisuhdong naova kikhu khumu hen.

³⁰Keiman kakamin Pakai chu nasatah-in vahchoi jinge, henge, mipi lah-a amachu ka vahchoi ding ahi.

³¹Ajehchu ahinna themmo chansahho-a kona huhdoh dinga, ama migenthei ho jetlama ding ding ahi.