Read Thado Chin Labu 111 Bible Online

Labu 111 - Thado Chin bible

Labu 111

¹Pakai chu vahchoijun; Mi kitah ho kikhopnale mipi kikhomho lah-a, kalung pumpin Pakai chu vahchoi jinge.

²Pakai thilbolho chu alenin, chule akipah hon hihochu akholdoh sohkeijuve.

³Athilbol chu ja umtahle loupitah ahin, achonphatna chu tonsotna umjing ahi.

⁴Aman athil kidang bolho chu geldoh jing dingin asemin; Pakai chu lungset them le lainatna-a dimset ahi.

⁵Ama gingho anneh apejin, akitepna chu tonsotna ahet jingding ahi.

⁶Pathen hephalouho gouchu amaho apeh theinadin, anatoh thaneije amite amusahtai.

⁷Akhutna anatohho thutah le thutandih ahin, athupeh jouse chu atahbeh ahi.

⁸Hicheho chu tonsot atonsotna din dettah-in ading jingin, chuleh hicheho chu thutah le chondih na-a tohdoh-a um ahi.

⁹Aman amite henga lhatdamna ahinsolin, akitepna chu tonsotnadin thupeh apen, amin chu atheng le ja um ahi.

¹⁰ Pakai ginhi chihna kipatna ahi; athupeh bolho jousen hetthemna phatah aneijun, ama thangvahna chu tonsotnin aumjinge.