Read Thado Chin Labu 115 Bible Online

Labu 115 - Thado Chin bible

Labu 115

¹Keiho heng hilouvin, vo Pakai keiho heng hilouvin, amavang nami hepina le nathutah jal-in nangma minin loupina pen.

²Ibola Pathen hephalouten, a-Pathen'u tu-a hoiba hitam? atiu ham?

³Ahinla i-Pathen'u van ho-a uma ahin, aman adeichan abol ahi.

⁴ Amilimu chu dangka le sana ahin, mihemho khutsoh ahi.

⁵Amahon kam aneijun, apaothei pouvin; mit aneijun, ahinla kho amupouve.

⁶Amahon bil aneijun, ahinla ajapouvin; nah aneijun, ahinla imacha nam ajapouve.

⁷Amahon khut aneijun, imala akhoithei pouvin; keng aneijun, achethei pouvin, alolhomuva konin jong apaothei pouve.

⁸Amaho semho chu amaho bangbep ahin; amaho tahsan chan jong chutichu ahi.

⁹Vo Israel, Pakai chu tahsanun, ama chu apanpiule alumdalu ahi.

¹⁰Vo Aaron insung mite, Pakai chu tahsanun, ama chu apanpiule alumdalu ahi.

¹¹Pakai ging nanghon, Pakai chu tahsanun, amachu apanpiule alumdallu ahi.

¹²Pakaiyin eikhohsah jingun phatthei eibohdiu ahi; Aman Israel insung phatthei abohding, aman Aaron insung phatthei abohding ahi.

¹³ Aman Pakai gingho chu alen aneo agoma phatthei abohding ahi.

¹⁴Pakaiyin nangho hapuna napunsahdiu, chule nachateo apunsah chehdiu ahi.

¹⁵Nangho chu vanle leiset sem, Pakai phattheiboh nahiuve.

¹⁶Vanle vanho tah chu Pakaiya ahin, leiset vanghi mihem chate anapeh ahi.

¹⁷Mithin Pakai avahchoipon, thipchetna chesuh-in jong avahchoipoi.

¹⁸Ahivangin eihonvang tua pat tonsot geijin Pakai chu vahchoi ute. Pakai chu vahchoijun.