Read Thado Chin Labu 118 Bible Online

Labu 118 - Thado Chin bible

Labu 118

¹ Pakai chu aphat jeh-in, thangvahna peovin, ajehchu ahepina a-imatih chana umjing ahi.

²Ahepina a-imatih chana umjing ahi, tin Israel'in tun seijuhen.

³Ahepina imatih chana umjing ahi tin, tun Aaron insung miten seijuhen.

⁴Ahepina a-imatih chana umjing ahi tin, tun Pakai gingten seijuhen.

⁵Pakai chu lung gentheijin kakouvin, Pakaiyin eidon butnin mun lentah-a eikoije.

⁶ Pakai chu keilama pang ahin, keima kicha ponge, mihemin i-eilo thei ding ham?

⁷Pakai chu keimale eipanpi hoto pangkhom ahin; hijeh-a chu eihot bolte chunga kalungtup kamuding ahi.

⁸Mihem'a kingai sangin, Pakaiya tahsan ngap aphajoi.

⁹Pipuho-a kingai sangin, Pakaiya tahsan ngap aphajoi.

¹⁰Nam jousen keima eiumkim velun; ahivanga keiman Pakai mina amaho kasuhmang ding ahi.

¹¹Amahon eiumchah taove, henge, amahon eiumchah taove; ahivanga keiman Pakai mina amaho kasuhmang ding ahi.

¹²Khoi bangin eitomchah un, meisi lingnei banga suhmit ahiuve; ajehchu keiman Pakai mina amaho kasuhmang ding ahi.

¹³Nangin kalhuhna dingin hatah-in neihin sonin; ahinla Pakaiyin eikithopin ahi.

¹⁴ Pakai chu kathahatna le kala ahin, ama kahuhhingpa ahung hitai.

¹⁵Kipanale huhhingna aw ginchu, michonpha houbuho-a chun aumin; Pakai khutjet nin hangsan tah-in aboljin ahi.

¹⁶Pakai khutjet chu choisangin aumtan, Pakai khutjet nin hangsan tah-in aboljin ahi.

¹⁷Keima thilouva kahin ding, chule Pakai thilbolho chu kaphondoh ding ahi.

¹⁸Pakaiyin eisehgim behsehtan; hinla thinagei lomin eina pedohpon ahi.

¹⁹Chonphatna kotpiho chu neihon peh-in, asunguva lutning ting, Pakai chu vahchoi jinge.

²⁰Hichehi michonpha lut nading, Pakai kotpi ahin.

²¹Nangma vahchoi jinge, ajehchu nangman neingaipeh-in, kahuhhingpu nahunghitai.

²² In sahon anot thapmu song chu, inning songpi penin ahung pangtai.

²³ Hichehi Pakai thilbol ahin, imitnuva kidangtah ahi.

²⁴Hichehi Pakai sem nikho chu ahin, hichea hi ikipa thanop diu ahi.

²⁵ Tun huhhingin, vo Pakai, nahenga katao ahi, vo Pakai, nahenga katao ahi, tun phattheina hinsolin.

²⁶ Pakai mina hungpa chu anun nome, Pakai in'a konin phatthei kahinboh uve.

²⁷Pathen hi vah eimusah-u Pakai chu ahi; ganlhaina chu maicham kiho-a khao ho-a chun henuvin.

²⁸Nangma ka Pathen nahin kavahchoi ding nahi; nangma ka Pathen nahin kachoi sang ding nahi.

²⁹Oh, aphatjeh-in Pakai chu thangvah un, ajehchu ahepina a-imatih chana umjing ahi.