Read Thado Chin Labu 119 Bible Online

Labu 119 - Thado Chin bible

Labu 119

¹ALEPH Lamlhah-a kisubohlou, Pakai danthua chonpa chu anunnom ahi.

²Ahettohsah naho tuhdetna, chule lungthim pumpi-a ama holla chu anunnom ahi.

³Amahon khangitlou jong abol pouvin, ama lamlhah-a chun acheuvin ahi.

⁴Chingthei tah-a nachon danho nitdingin, nangin thupeh neipeuvin ahi.

⁵Nachon danho kajuina dinga kachon dingdan eikihila hitavele o!

⁶Nathupeh jouse kajabol tengle keima jahcha taponge.

⁷Nachon phatna thutan naho kakihil tengle, lungtheng tah-a kavahchoi ding nahi.

⁸Nachon danho kanitjing ding ahin; nangman neidalha manghel hih-in. BETH

⁹Khangdongin alampi iti asuhtheng thei ding ham? Nathu dungjuija chingthei tah-a hinkho amana kon hiding ahi.

¹⁰Kalung pumpin nangma kanaholle, O nathupeh ho-a konin neilam vaisah loujenin.

¹¹Nangma douna-a kachonset kit lou nadin, nathu kalung sunga kaselle.

¹²Vo Pakai anunnom nahi, nadanthu kisunho neihilin.

¹³Nakama nathutan lhahho jouse, kamuh-in kaphongdoh tan ahi.

¹⁴Haona jousetoh kikotnin, nathu hettohsah naho lampi achun kana thanomin ahi.

¹⁵Nachon danho keiman ngaito ingting, nalampi ho jabolinge.

¹⁶Nachondan kisunho-a kipah jinging ting; nathu chu kasuhmil louding ahi. GIMEL

¹⁷Kahin theina dingle, nathu kanit nadin, nasoh chunga hin kiphal tah-in na tongin.

¹⁸Nachondan thua kona thilkidang ho kamu theinadin, kamit hasah inlang hin.

¹⁹Leisetna kholjin kahin, nathupeh ho chu keija konin selhih-in.

²⁰Nathutanlhah phattina lhangai na-in kahinna hi suhlam vaijin aumtan ahi.

²¹Nathupeh ho-a kon vahmanga, mikiletsah sapset changho chu naphohsalin ahi.

²²Keija konin i-sah lounale housetna ho lamangin; ajehchu keiman nahettohsahna ho kanit jinge.

²³Pipuiho jong atouvun chule eiseiseuvin, ahinla nasoh hin nadan kisunho kangaiton ahi.

²⁴Na hettohsahna jong chu kakipanale eithumopma ahi. DALETH

²⁵Kahinnahi leivuija abehchah tan; nathu dungjuijin neisuhalin.

²⁶Kalamlhah ho kaphong doh-in, nangin neijahpeh tai; Na danthu kisunho neihilin.

²⁷Nachondan lampiho neihet them sah-in; chutichun nathilbol kidangho seichoi lenge.

²⁸Kahinna lungkhamin ajunlha tai; nathu dungjuijin neihatdoh sah-in.

²⁹Jouseina lampi keija konin chondoh-in; lungsettah in nadanthu neipejotan.

³⁰Thudih lampi chu kana lhengin; Nathu tanlhah ho kamasanga kakoije.

³¹Nathu hettoh sahho katuh jinge, O Pakai, neijumso hih-in.

³²Kalung nakhantou sah tengle, nathupeh lampia chun lhaijinge. HE

³³Vo Pakai na danthu kisunho lampi neihilin, chutile akhonna geija kachintup ding ahi.

³⁴Nadanthu kanit theina dingin hetkhen themna neipen, henge, kalung pumpin nit ing kate.

³⁵Na thupeho lampia neiche sah-in, Ajehchu hichea chu kipah kahi.

³⁶Kiloset lam hilouvin, nathu hetohsahna lama chun neilunglut sah-in.

³⁷Manmo vetna-a konin kamit heimangin, chule nalampi-a neisuhalin.

³⁸Nangma ginna-a lunglut, nasohpa henga nathu sudetnin.

³⁹I-eikisah louna kakichat hi heimangin, ajehchu nathu tanlhahna chu aphan ahi.

⁴⁰Vetan, nachondan thuchu kalhangai jinge, nachon phatna-a neisuhalin. VAU

⁴¹Vo Pakai nami hepina kahenga hunghen, nathudih dungjuijin nahuhhingna jong hunglhung hen.

⁴²Nathu katahsan jala, i-sah louva eibolho chu adonbutna kaneiding ahi.

⁴³Kakama kona thutah thu chu lamanghel hih-in, ajehchu nathu tanna-a kinema kahi.

⁴⁴Chutia chu nadanthu tanglouva, atonsot atonsot geija kanit ding ahi.

⁴⁵Nachondan thuho kahole jeh-in, keima chamlhat tah-in choninge.

⁴⁶Lengho angsunga jong nathu hettohsah ho seijing ting, chule keima jahchaponge.

⁴⁷Chule kanangailut jing, nathupeh ho-a chun kipah inge.

⁴⁸Kanangailut jing, nathupeh ho lama chun kakhut jong domsang inting, nadan kisunho ngaitonge. ZAYIN

⁴⁹Achunga neikinep sahna, nasoh thusei chu geldoh-in.

⁵⁰Nathun hinna eipeh jala, hichehi kahesohna-a kalhamona hiding ahi

⁵¹Mikiletsah-in nasatah-in einuisatnin, ahinla nadanthu-a konin kalhadah dehpoi.

⁵²Vo Pakai malaija nathu tanlhah ho chu kahejingin, lhamon nan kaneijin ahi.

⁵³Nadanthu nungsun mikhang gilouho jeh-in, kichatnin kadimtan ahi.

⁵⁴Ka kholjina insunga dinga la chu, Nadanthu kisunho chu ahi.

⁵⁵Vo Pakai namin chu janteng kageldohjin, nadanthu chu kanit jingin ahi.

⁵⁶Nachon danthu kavetup jeh-in, hichehi kanei ahi. HETH

⁵⁷Vo Pakai nangma keija nahi; nathu kanit ding ahi tin kanaseije.

⁵⁸Kalung pumpin nalungsetna kangeh-e; nathu dungjuijin hepina neineijin.

⁵⁹Kalampi ho kangaiton, nathu hettohsahna lama kakeng kahei tai.

⁶⁰Nathupeh ho nitdingin kakinon, kageisangpoi.

⁶¹Mikhang gilou kiloihon eichomun; ahivangin nadanthu chu kasumil pon ahi.

⁶²Nachon phatna thutan ho jeh-in, khangkim laijin thouving ting nangma thangvah inge.

⁶³Nangma ginghole nachondan thu nit ho jouse dinga loile gol kahi.

⁶⁴Vo Pakai, leiset hi nahepina dimset ahi; nadanthu kisunho neihilin. TETH

⁶⁵Vo Pakai nathu dungjuijin, nasohhi neibol phalheh jengin ahi.

⁶⁶Thutan dihtah leh hetna neihilin, ajehchu nathupeh katahsanin ahi.

⁶⁷Eiki bolgim masang chun kana vahmangin, hinla tunvang nathu kanit tai.

⁶⁸Nangma naphan, thilpha nabole; Nadan kisun ho neihilin.

⁶⁹Mi kiletsah-in kei dounan jou asemthun, kenvang kalung pumpin nadanthuho vetup inge.

⁷⁰Alungu sathao bangin athaovin, keivang nadanthu-a kipah inge.

⁷¹Nadanthu kisun ho kahet theina dinga, eiki bolgim chu keidingin aphan ahi.

⁷²Sanale dangka sang tamtah sangin, nakama danthu sohdoh chu keidin aphajon ahi. YOD

⁷³Nangman nakhutna neisema neigontoh ahin; nathupeh kahet theina din hetkhen themna neipen.

⁷⁴Nathu-a kinema kaumjing jeh-in, nangma ginghon eimu tengule kipah unte.

⁷⁵Vo Pakai nathu tanlhah ho adih-in, tahsan umtah-a neibolgim ahi ti kahei.

⁷⁶Katao ahi, nasoh henga nathusei dungjuijin, nahepi lungsetna chu kalha mona hihen.

⁷⁷Kahin theinadin, nahepina thah chu kahenga hunghen; ajehchu nadanthu chu kakipana ahi.

⁷⁸Ajehbeija eibolval jeh uvin, mi kiletsahho chu jahchao hen, keiman vang, nachondan thuho chu kangaito jinge.

⁷⁹Nangma gingho, nathu hetohsah heho chu keima lama hungkihei juhen.

⁸⁰Kajachat louna din, kalunghi nadanthu kisun ho-a det hen. KAPH

⁸¹Nahuhhingna ngaichan, kahinna alhasamtai; ahinla nathun kakineme.

⁸²Nathu-a dingin kamit alosamtai, itihle neilhamon ding ham? kati.

⁸³Meikhu lah-a hai um tobang kahitai; hijongle nadanthu kisun chu kasumilpoi.

⁸⁴Nasoh nikho hohi ijat-ham, eisugentheiho chunga itihle thu natan ding ham?

⁸⁵Mi kiletsah nadanthu banga umlouhon, kokhuh eilaipeh uvin ahi.

⁸⁶Nathupeh ho jouse tahsan um ahin, amahon dihlou tah-in eibolgimuve, neipanpin.

⁸⁷Amahon leiset chungahi eisuhmang konu ahitan; kenvang nachondan thuho kadalhapon ahi.

⁸⁸Nalungset hepina bangin neisem thah-in, chutichun nakamsung thu hettohsah chu juijinge. LAMED

⁸⁹Vo Pakai, nathuhi a-imatih chanin van'a aumjinge.

⁹⁰Nakitahna chu khang jouse-a aumin; nangman leiset naphut doh-in, hichu aumjingin ahi.

⁹¹Nahou danthupeh dungjuijin amaho tulai geijin aumjinge; ajehchu abonchauva nasohte ahiuvin ahi.

⁹²Nadanthu hi kakipana hilou hile, kalung hesoh-a chu anamangthah ding kahitai.

⁹³Nachondan thuho chu a-itih in sumil pong kate, ajehchu hicheho-a chu hinna neina peh ahi.

⁹⁴Nanga kahi, neihuhhing in, ajehchu nachondan thuho kanaholin ahi.

⁹⁵Mi khangilou chun suhmang dingin eingah-e, ahivangin nathu hetohsahna ho kagel jing ding ahi.

⁹⁶Chamkimna jouse akhonna kamutai; ahin nathupeh vang ajao lheh jengin ahi. MEM

⁹⁷Oh, nadanthu hi iti kangailut hitam! nilhumkeijin kangaitojin ahi.

⁹⁸Nathupeh ho-a kona kamelmate sanga chingjoa neisem ahi; ajehchu hichu keitoh aum jingin ahi.

⁹⁹Eihilho jouse sangin hetthemna kaneijoi; ajehchu nathu hettohsah naho chu kangaiton ahi.

¹⁰⁰Nachondan thuho kavet tup jal-in, malai miho sangin hetkhen themna kaneijoi.

¹⁰¹Nathu kanit theina din, setna lampi ho-a konin kakeng kakangsen ahi.

¹⁰²Nathu tanlhah na-a konin kana kihei mangpoi; ajehchu nangma tah-in nei nahilsa ahi.

¹⁰³Nathuhohi keija dinga iti lhuma hitam! Henge, kakama khoiju sangin alhumjon ahi.

¹⁰⁴Nachondan thuho-a konin hetkhen themna kaneijin; hijeh chun lampi dih lou jouse kathen ahi. NUN

¹⁰⁵Nathuhi kakeng dinga thaomei ahin, ka lampi dingin vah ahi.

¹⁰⁶Keima nachonphat nathutan ho nit dingin, kaki hahsel in kaphut det tai.

¹⁰⁷Vo Pakai eiki bolgim behsehtan; nathu dungjuijin neisuhalin.

¹⁰⁸Vo Pakai kangeh ahi, kakama lungcham thilpeh hi sangin lang, nathu tanlhah naho chu neihilin.

¹⁰⁹Kahinna kakhutna aumjingin; hijongle nadanthu kasumil dehpoi.

¹¹⁰Mi khang gilou chun thang eikampeh-in; hijongle na danthuho-a konin kavahmang dehpon ahi.

¹¹¹Nathu hettohsah naho chu katonsot goudin kakilah-e; ajehchu hicheho chu kalung kipana ahi.

¹¹²Akhonna geija nadanthu kisunho tohdoh nadin, kalungthim kapetan ahi. SAMEK

¹¹³Mohthil ngaitohi kahon, ahin, nadanthu vang kangailun ahi.

¹¹⁴Nangma kakiselna munle kalumdal nahin, nathu-a kakineme.

¹¹⁵Nangho khanset bolho, keijakonin potdoh-un, ajehchu ka Pathen thupeh ho chu kanga tup ding ahi.

¹¹⁶Kahin theinadin nathu dungjuijin neituh-in, kakinepna-a neijachat sah hih-in.

¹¹⁷Neituh detnin chutileh kahoidoh ding ahi; chule nadanthu kisun ho tanglouva kajabol ding ahi.

¹¹⁸Nadanthu kisunho-a kona vahmangho jouse chu nachotpha tai; ajehchu amilhep lhahnao chu jou ahi.

¹¹⁹Nangin migilouho jouse chu thih-eh bangin nasumangin, hijeh chun nathu hettohsah naho kangailun ahi.

¹²⁰Katahsa nangma ginan akihotnin, chule nathutannaho chu kakichan ahi. AYIN

¹²¹Thutandih le chonphatna kabole, eibol gentheiho hengah eidalha hih-in.

¹²²Nasoh phatnadin kitungin lang, mihoitho chu eisuh genthei sah hih-in.

¹²³Nahuhhing nale nachon phatna thu holna-a konin, kamit hi alhasam tai.

¹²⁴Nami hepina dungjui jin nasoh hi bolin lang, nadanthu kisemho neihilin.

¹²⁵Keima nasoh kahin; nathu hettohsah naho kahet khen thei nadin, het themna neipen.

¹²⁶Pakai nang dinga natoh phat ahitai; ajehchu nadanthu anotthap taovin ahi.

¹²⁷Hijeh chun sana sangin nathupeh kangailun; henge, sana thengsel sangin kangailu jon ahi.

¹²⁸Hijeh chun nachondan thuho jouse, adih ding thil jouse kajabolin; lampi dihlou jouse kathen ahi. PE

¹²⁹Nathu hettohsahnaho chu kidangtah ahin; hijeh-a chu kahinna-in hiho chu anitding ahi.

¹³⁰Nathu lutna chun vah apejin, hichun milhamho hetkhen themna apejin ahi.

¹³¹Kakam kan, kahaihai jenge; ajehchu nathupeh ho kangaichan ahi.

¹³²Namin ngailuho nabolnaji bangchun, keima neivenlang, neihepi tan.

¹³³Nathu-a kakholhah ho thu penlang, kachunga khansetna himhim vaipohsah hihbeh-in.

¹³⁴Mihem suhgentheina-a konin neihuh doh-in, chutichun nachondan thuho nit inge.

¹³⁵Nasoh chunga hin namai vahsah inlang, nadanthu kisun ho neihilin.

¹³⁶Amahon nadanthu anit loujeh-un, kamit lhi vadung twi bangin alonglhan ahi. TSADDE

¹³⁷Vo Pakai nangma chonpha nahin, nathutan ho chu dihtah ahi.

¹³⁸Nangin napeh nathu hettohsah naho chu, chonpha le kitah ahi.

¹³⁹Kamelma ten nathu asuhmil jeh-un, katompan na-in eisumang tan ahi.

¹⁴⁰Nathuhi athenglheh jengin, hijeh-a chu nasoh-in kangailun ahi.

¹⁴¹Keima neochale isahlou kahin, hijongle nachondan thuho chu kasumil pon ahi.

¹⁴²Nachon phatna chu tonsot chonphatna ahin, nadanthu chu thutah ahi.

¹⁴³Lungkhamnale natthoh lel-in eituhchah-in, hijongle nathupeh ho chu kakipana ahi.

¹⁴⁴Nathu hettohsah naho chonphatna chu tonsotna ding ahin; hetkhen themna neipen, chule hingjing tange. KOPH

¹⁴⁵Kalung pumpin kakouve, neingaipeh-in, O Pakai, nadanthu kisun hi kanit ding ahi.

¹⁴⁶Nangma kakouve, neihuhhing in, chutia chu nathu hettohsah naho kanit ding ahi.

¹⁴⁷Khovah masangin kathouvin, chuin nang kakouvin, nathu-a kaki nem-e.

¹⁴⁸Nathu kagelthei nadin, jankhon mitsing louvin kaumin ahi.

¹⁴⁹Nalungset hepina dungjuijin ka aw ngaijin, vo Pakai nathutandih dungjuijin neisem thah-in.

¹⁵⁰Thilphalou nung juiho chun eihin naijui; amaho nadanthu-a kona gamla ahiuve.

¹⁵¹Vo Pakai nangma nailamcha nahin, nathupeh jouse thudih ahi.

¹⁵²Nathu hettohsah chungchanga, nangman tonsotna dinga naphudetsa ahitai, ti malaija pat kahet ahitai. RESH

¹⁵³Kathoh gimje hi ngaitonlang, neihuh doh-in, ajehchu nadanthu kasumilpon ahi.

¹⁵⁴Kachungthu neisei lhahpeh inlang neihuh doh-in, nathu dungjuijin neisem thah-in.

¹⁵⁵Huhhingna chu migilou ho-a kona gamlatah ahi; ajehchu amahon nadanthu kisun aholpouve.

¹⁵⁶Vo Pakai nahepinaho chu nasatah ahi; Nathutanlhah dungjuijin neisem thah-in.

¹⁵⁷Eisugentheile kamelma atam lheh-un; hijongle nathu hetohsah na ho-a konin kalhasam dehpoi.

¹⁵⁸Suhkhel neiho kaven, nathu achintuplou jeh-un kalung akhamin ahi.

¹⁵⁹Ngaito temin, nadanthuho iti kangailut hitam; vo Pakai nalungset hepina dungjuijin neisem thah-in.

¹⁶⁰Atil abula pat nathu hi adih-in; chule nachon phatna thutan ho chu tonsotnin aumjingin ahi. SCHIN

¹⁶¹Ajehbeijin pipuihon eisugentheijun; ahinla kalunghi nathu-a tijatah-in ading jingin ahi.

¹⁶²Thil tamtah chomdohho bangin, nathu-a hin katha anomlheh jie.

¹⁶³Jouhi kathen kakidah-in, Na danthu vang kangailun ahi.

¹⁶⁴Nachon phatna nathutan naho jeh-in, nikhatnin sagivei nangma kathangvah-e.

¹⁶⁵Nadanthu ngailuhon chamna loupitah aneijun; imachan amaho asuhmo louding ahi.

¹⁶⁶Pakai nami huhhingna-a kakinemin kangah-in, nathupeh ho kabolin ahi.

¹⁶⁷Kahinna-in nathu hetohsahna ho anitjingin, nasatah-in kangailun ahi.

¹⁶⁸Na danthu kisunhole nathu hetohsahna kanitjinge; ajehchu kalampiho jouse na masanga aumin ahi. TAU

¹⁶⁹Vo Pakai kakana nakom hunglhung hen, nathu dungjuijin hetkhen themna neipen.

¹⁷⁰Kataona na-ang hunglhung hen, nathu dungjuijin neihuhdoh in.

¹⁷¹Kakamin navahchoina aphondoh ding ahi, ajehchu nangman nadanthu kisunho neihile.

¹⁷²Kaleijin nathuho aseiding ahi; ajehchu nathupeh jouse chonphatna ahi.

¹⁷³Nachondanthuho kalhen jeh-in, nakhut chun eiki thopihen.

¹⁷⁴Vo Pakai nami huhhingna kalhangaijin, nadanthu hi kakipana ahi.

¹⁷⁵Kahinna hinsah in, chuteng kavahchoi ding nahi, chule nathutan lhahna-a chun neipanpin.

¹⁷⁶Kelngoi mang bangin kana vahmang tai; nasohhi neihin hollin, ajehchu nathupeh kasumilpon ahi.